林文龍喺2008年拍完《法證先鋒II》後離開無綫電視，遊歷9年，舊年回巢拍攝4K劇集《不懂撒嬌的女人》，飾演Gordon嘅林文龍，佢嘅暖男形象撻著咗唔少中女心！其後林文龍再同關樹明合作拍《再創世紀》，今次佢飾演迷債設計者兼基金代理人Duncan，鏡頭前同樣與Gordon同樣有型有款，不過眉宇間有林文龍嘅特質浮現。
林文龍日前喺尖沙嘴接受訪問，提到今次嘅角色，佢覺得兩個角色只係外型近似，但事實係兩個世界嘅人，反而覺得Duncan與自己有相似，他笑說：「我覺得係有啲似，不過呢個角色喺呢段時間落喺我手，係好嘅timing，事實上我自己喺呢幾10年，無論係圈內圈外，都經歷高低起跌，喺我自己嘅記憶系統，又或者歷史有一定嘅資料俾我參考，所以o依家嘅角色喺我手，可以加啲經歷入去角色，但係如果呢個角色喺10幾年前出現，相信會演得比較吃力。」
言談間提到戲中有一幕係林文龍為注資嘅事同潘志文有啲爭拗，臨走前對潘翁講咗一句：「我其實唔係咁難相處！」唔知呢句說話係咪代表自己？林文龍就話：「我入行31年，一路以嚟好多人覺得我好cool，難聽啲講覺得我好寸，不過識得耐咗，你會發覺我唔係一個難相處嘅人，好似Niki（周勵淇）話過第一日開工見到好驚，其實唔止佢一個人講過，好多未合作過人都係咁諗，不過合作咗之後，完全係兩回事。其實我係鱷魚頭老襯底嘅人，純綷係外表，熟咗之後係無所不談，我都好深明呢樣嘢，但係我都冇辦法，唯有去韓國整整佢。」
林文龍再笑笑口話：「唔止外型，其實我自己本身唔係太埋堆，太social嘅人，我會覺得知我嘅係一定會信我，如果你搵我拍戲要我埋堆，我諗我唔會做呢樣嘢，搵得我係因為我適合呢個角色，欣賞我呢個人。」
後來又問到林文龍點睇自己入行呢31年？佢就話：「唔可以講後悔，以前年少氣盛嘅時候，好多嘢得嚟太容易，唔識得珍惜同把握機會，我自己親手推走嘅機會亦都不少，呢個咪就係經歴，如果冇呢啲嘢，今日就唔可以數得番出嚟，可以提醒自己曾經咁樣，到今日再出現某啲嘢嘅時候，知道點樣處理，把握每一個機會，唔會輕易放棄。好似人際關係，多個朋友好過多過敵人，呢啲係累積番嚟。」佢續話：「我唔會覺得係可惜，亦需要埋怨，如果唔係每一日會過得好頹廢同唔開心，人係需要展望將來，明天係會更好。」
場地提供：Cafe Deco 峰景餐廳 (The ONE)
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|