軟硬天師的歌曲《廣播道Fans殺人事件》，是90年代的集體回憶，歌詞中提到「嘩！陸家俊我哋支持你。」大家又記得是誰？現年43歲的90年代歌手陸家俊，於1992年出碟，而在1993年底因拍攝MV受傷而退出娛樂圈，2000年重返娛樂圈拍劇，但不久又消聲匿迹，到早幾年成立娛樂公司，直至最近又再宣布復出，他接受東網專訪時透露，去年有DJ朋友叫他參加外國音樂節，接觸得多開始有興趣，本周六更會首次在香港出DJ騷。
計劃要減40磅
在唱歌方面，簽了新經理人公司的他透露獲無綫節目《流行經典50年》邀請，暫定12月會上節目，笑言有更好狀態才會上去：「因為螢幕會拉闊咗，所以要Keep Fit先，起碼想減40磅。」他表示最高峰試過240、250磅，但不肯透露現時體重。問心態上是否已經準備好出來再見大家？他說：「其實都冇乜嘢，可能因為好細個已經做呢行，都有Keep住睇電視節目，唔會陌生，不過都要睇吓到時出番嚟嘅反應係點，唔知大家鍾唔鍾意。」
得周潤發教路
講到在娛圈輾轉復出，問是否一直念念不忘娛圈？陸家俊坦言：「因為本身由細到大都係玩音樂，好難脫離到呢個興趣，但唔啱嘅時候咪唔做。」問當年因傷退出覺得可惜？他表示：「當年拍MV跌倒，隻腳撞到爆血管，腫到3隻腳咁粗，住咗兩、三個月醫院，出院之後想去美國進修音樂，所以同公司講，到後來去咗外國，成日睇TVB劇，對演戲有興趣，但返嚟拍咗幾年劇又冇再做，覺得自己火喉未夠，對續約好懶散，可能當時仲係廿幾歲。」
問可會覺得現時成熟了，反而是更好時機再做幕前？他說：「都會，人嘅歷練好緊要，記得當年問過周潤發演戲心得，佢同我講要周街望嘢，觀察人生百態，到好多年後我先識。」
太肥冇人認得
講到當年與同公司的蔡興麟總被人相提並論，問今次復出可擔心外界又拿兩人作比較？陸家俊笑言：「有比較過咩？係個名成日連埋一齊，其實係因為軟硬天師首歌《廣播道Fans殺人事件》，一開始就提咗我哋兩個個名，後來少爺占做廣播劇又用我個名做角色名，而當奴就叫「蔡興麟」，所以搞到啲人成日以為我哋黐埋一齊，但其實冇乜關係。（同佢有聯絡？）成廿幾年冇見過。」
黃翊和蔡興麟等90年代歌手輪流復出，一眾網民不忘召喚他，他笑言：「真係好多謝大家仲記得我，真係好Surprise（驚訝），原來大家冇遺忘過我。」他又笑言早幾年出街都有人認得，但近年已經冇，可能是因為自己肥了。
場地：BOOM LAB
|
鍾意就快D Share啦！
|
|
|
