56歲曾文豪再做老竇！
恭喜恭喜！今年6月嫁入豪門的前港姐李美慧宣布為56歲老公曾文豪誕下女兒，笑言囡囡出世後自己就要變身宮女貼身服侍BB，計劃餵哺母乳的她更找專業催乳師幫忙，準備充足！
現年31歲的李美慧（Vivi）與年長25歲的百億富商曾文豪今年6月拉埋天窗，同時宣布有孕，Vivi日前終於「卸貨」，順利誕下重六磅多的千金，前晚她在社交網留言「我們的小糖心」，並上載兩張照片，一張是Vivi與老公頭貼頭、手抱囡囡，另一張則是母女鼻貼鼻，畫面溫馨有愛。
老公冇剪臍帶
Vivi產後已回家休息，她透露BB的樣子較似爸爸，又指分娩過程不算辛苦：「都係正常作動冇幾耐就生咗，唔算好辛苦。（老公有冇陪產？有冇剪臍帶？）老公有陪住我，但好似冇剪臍帶。（你哋有冇感動到喊？）冇喊，我哋都好堅強，老公不停喺旁邊安慰我，不停鼓勵我，見到BB真係好開心！（BB改咗名未？）仲未決定好呀！」嫁入豪門後萬千寵愛在一身，但Vivi笑言誕下小千金後，自己會做回劇集《宮心計2深宮計》宮女角色服侍愛女，認真搞笑！
梁麗瑩瞓床沾福氣
為了BB健康着想，Vivi盡量餵人奶，並透露現時上圍暴升兩Cup，而作為新手媽媽，她早已搵定專業催乳師幫忙。講到初為人母的感受，她坦言很感恩：「感謝主賜畀我哋一個聽話嘅BB。（對BB有咩期望？）最希望佢以後可以做動物醫生，幫助更多生命。（老公有冇送咩畀你做獎勵？）佢嘅陪伴已經係最好嘅獎勵」
另外，Vivi的好友、前港姐梁麗瑩得悉喜訊後，即到醫院探望，更躺在床上影相，笑言想藉此沾染幸福氣息：「探吓個新手傻媽同佢粒傻豆，好可愛！順便嚟瞓吓幸福人妻、人母張床，聽講瞓完就好快輪到我哋幸福喇！」
更多新聞，請瀏覽東方日報網頁：
http://orientaldaily.on.cc/
來源 source: http://hk.on.cc
|
鍾意就快D Share啦！
|
|
|
