熱爆娛樂: 【金豬牌過大禮】蕭潤邦向江若琳求婚即落訂唔介意畀多次禮金 _

2018年10月29日星期一

【金豬牌過大禮】蕭潤邦向江若琳求婚即落訂唔介意畀多次禮金 __,江若琳,蕭潤邦,

「生煎包王子」蕭潤邦（Oscar）去年底向女友江若琳求婚成功，今年初宣布婚訊，好日子訂喺12月23日，距離婚期尚餘兩個月，今日Oscar就安排兄弟帶住大堆禮物到女家過大禮，佢哋跟足傳統儀式，待儀式完成後，先同家人合照留念。

Oscar準備咗厚禮到女家，當中除咗有喜餅、果籃、冬菇、花同海味外，當然唔少得金器，相中見到有一個金豬牌、兩對龍鳳鈪同一隻戒指。Oscar今日接受《蘋果》訪問時話：「傳統嘢我真係乜都唔識，好彩今次搵咗金牌大妗姐麗姐幫手，我每日好似小學生交功課咁，不停WhatsApp佢，我今日買咗咩。到今日過大禮嘅時候，因為傳統新郎哥係唔出現，所以我只係負責做柴可夫，全靠一班兄弟同麗姐。」江若琳就話：「今次過大禮，我哋盡量都跟足傳統，結果攰爆Oscar，每日有好多濕濕碎碎嘢準備，有時我會突然彈起，問佢買咗呢樣、嗰樣未，佢話我終於有一個新娘嘅狀態。」兩人雖被複雜程序搞到頭都暈，卻又非常樂在其中。

問到禮金，Oscar一句心意最重要，佢自爆今日第二次畀禮金，點解畀咗兩次？Oscar話：「之前求婚嘅時候，好驚世伯伯母唔嫁個女畀我，所以一求完婚即刻畀禮金，到準備過大禮先知，原來禮金係應該今日先畀，世伯伯母話畀咗唔使再畀，但係我堅持，我希望畀佢哋見到我嘅誠意，相信我一世都會對老婆、對佢哋好。」Oscar唔介意好事成雙，江若琳父母當然感受到未來女婿呢番誠意。

精選娛聞，喺晒《娛果》

http://fb.com/appledailyent

Oscar今日帶金器同禮金到女家過大禮。	Oscar話今日過大禮，全靠大妗姐麗姐幫手。	 Oscar依足全傳統搞過大禮，仲向女家畀咗兩次禮金。
 江若琳收到男家送嚟嘅金器，包有金豬牌、兩對龍鳳鈪同金戒指。	 過大禮唔少得喜餅。