好多人成日話要做到老、學到老，但係真係做到嘅又有幾多人？今年已經88歲、人稱Ming Sir嘅劉兆銘，上至天文、下至地理，佛家思想、人生哲理，滔滔不絕。
訪問在一間餐廳進行。Ming Sir一邊食，一邊傾，氣勢迫人：「飲水啦，你可以畀多啲問題問我，我可以講餐飽，幾時講得晒？」眼前活脫脫就是一個好有霸氣嘅阿叔，好想戰鬥那種，完全不是Ming Sir常演角色那種陰沉。
他也笑：「我係一個無厘頭嘅人，講講吓你會唔知我講乜，不過我希望保持身體健康，笑演日落前。喺呢段時間，要搵人救我，因為我嘅火氣，就好似想戰鬥咁，想搵人打！幾廿歲人，咁咪過咗位囉！我唔知點搞！」
Ming Sir最近在網劇《蝕日風暴》飾演富商翁振中，表面上係做賣茶葉、古董生意的正當商人，不過實際上係「高桌會」嘅話事人，研製毒品操控市場，周圍遍佈爪牙。他每次出場，大家總被其氣勢所懾，不寒而慄。
【為亡妻暫停拍戲：好似人哋守靈咁】
2012年10月，Ming Sir太太張慧玲離世，之後有一段時間，Ming Sir暫停拍戲。
訪問當天，Ming Sir帶來了三副眼鏡，其中一個眼鏡盒上，還貼了亡妻的照片，相片背後寫著其生卒日期。他說：「以前太太成日跟住我做嘢，自從佢離開咗之後，我覺得失去咗一半對工作嘅嘢，嗰樣唔係叫做興趣，而係唔知做嚟做乜嘅嘢。
「我覺得佢已經唔喺度，唔做（演戲），我覺得當係懷念佢。食齋都係因為呢個原因。我唔演戲，就好似人哋守咩靈咁，古時咩三年先出嚟。」念及亡妻，Ming Sir語氣淡然，微微一笑。哀傷已轉化為深沉的思念。
「有人話我可以搵番個伴，亦都有人話可以做我個伴，但係我覺得自己有一個好奇怪思維，就算碰到一個幾靚嘅人，如果唔啱傾，即刻覺得佢冇味道，點靚都冇用，因為佢係佢，我係我。人同人嘅感情係好難講，要有一份共鳴喺度，要一齊好耐先有，我自己冇時間去搵，亦冇呢份精力。
「我都已經88歲，佢鍾意得你又幾多年呢？除非佢非常之精采，咪同佢博一鋪，如果唔係冇得搞，唔存在。依家我反而鍛練好自己嘅身體，自然有好多新鮮美麗嘅嘢可以重新接觸。」
【重出江湖拍戲：實情係玩自己！】
直到近年，Ming Sir才有限度接劇，想不到因為估唔到因為「翁振中」這個角色，又激發起那團火。
「以前喺TVB拍咗好多，但係因為身體問題，冇再拍。今次再返嚟拍戲，係好大考驗，遇上好多嘢係即興嘅事，先係喺四日內自己買晒自己嘅戲服，跟住好多時即日先收到劇本，喺唔知之前劇情嘅情況下，咪每一場戲推測之前嘅發展，同跟住會點，一邊創作一邊演，真係好好玩！我仲唔俾自己睇Playback，當係一個學習，一個修行，實情係玩自己！」
說到「翁振中」，Ming Sir說：「你以為有財有勢有謀就幸福咩？其實呢個人係好可憐！身邊一個人都冇，喺一個失落嘅世界生存，我要將呢個人嘅恐懼感隱藏得好緊要，唔好俾其他人估到，達到高處不勝寒，去到呢個最高峰，越做越殘忍，變咗演到最後，同導演講我點樣做都照拍，希望可以出現一個好特別嘅角色，我知道係唔容易，所以我真係唔知套戲係做成點！」
【「乜嘢都話等一等，你話幾痛苦！」】
結果呢啲所謂嘅難關又會有難度？Ming Sir話：「我同三個導演第一次合作，佢哋覺得好好玩，雖然有啲工作人員唔識，但佢哋俾咗我有一種『阿叔返嚟探親』嘅感覺，好似返咗一個好靚嘅鄉下一樣。拍完每一場戲，就有廿幾人影合照，有一種唔捨得你走嘅感覺，我係第一次感受到。
「拍咗咁多年都冇試過，搞到我有一種好Happy嘅感覺，仲令我好唔想退休，千祈唔好退休！我要爭取時間繼續做。
「如果我唔爭取，就唔會保護自己嘅身體，要鍛練好身體，先可以接嘢做，唔可以放鬆，要為出戰好準備！呢種係生命力嘅再生，有得互相比對，一休息就冇再生嘅能量，因為你已經不顧自己嘅根基。當有好靚機會俾你，就算有晒酒色財氣都冇用，乜嘢都話等一等，你話幾痛苦！」
精選娛聞，喺晒《娛果》
http://fb.com/appledailyent
| 攝影：陳俊強、沈健程 | | |
| | | |
| | | |
| | | |
| | | |
| | | |
| | |
|
鍾意就快D Share啦！
|
|
|
