滿月喇！林芊妤（Coffee）上月16日一索得男，生咗7磅重「咖啡仔」，日前Coffee透露囝囝已經改咗中文名翟德彥。今日係彥彥滿月大日子，坐完月嘅Coffee為隆重其事，就喺Ig貼咗一張溫馨滿滿嘅餵母乳相。
呢張充滿愛嘅溫馨照，上載咗短短兩個鐘，已經吸引3萬幾個網民讚好，好多網民都留言，大讚Coffee偉大，唔少媽咪仲話希望多啲人支持餵哺母乳，其他留言就包括「哺乳媽媽最美」、「滿滿的母愛」、「好羨慕啊 個胸型重咁靚」.......
當然，呢啲嘢永遠都有正反方，亦有網民接受唔到Coffee將餵母乳嘅相公開，留言質疑佢點解要咁做，好似話「餵咪餵點解要咁影俾人睇，都做咗人阿媽都仲係咁」，又話要unfollow佢。不過，大部份網民都好支持Coffee，仲因為力挺Coffee而與反對嘅網民爆罵戰，Coffee亦有回應網民：「其實只係一張好正常嘅相，相信我以前嘅泳衣相都性感過呢張啩？哈哈，我覺得今日係我第一個BB滿月嘅日子，想好好地喺自己平台post呢張相嚟紀念今日，因為其實係好幸福嘅事。」
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|
