「一個人霸兩個位」、「篋神橫行」、「開懷大嚼」每日喺港鐵車廂內上演，小記日日搭車，EQ都會上升到新境界，政府官員成日叫廣大市民「包容吓」，但當你見到呢位港鐵大媽，除咗一個人霸兩個半位，仲要施施然開餐，一臉悠閒，真係當自己返咗屋企咁，你哋包容到嗎？
facebook群組「香港人Secrets」上星期六晚，上載咗一條短片，片內一位着住連身裙嘅大媽，坐喺港鐵車廂入面，旁邊嘅座位放咗四大袋戰利品，咁都不特止，大媽仲要打側身坐，背脊緊貼身旁嘅中年男士，由段片見到，兩個人應該唔認識，個阿哥坐到縮晒膊咁，睇見都戥佢辛苦，大媽對於自己影響到人似乎毫無感覺，仲一路嘴郁郁咁，望真啲原來係食緊蛋糕，見佢一時望吓上面，又望吓前面，悠然自得，同小記喺屋企攤喺梳化睇電視嘅神情非常相似，但係大媽，你搭緊港鐵，除咗唔畀食嘢之外，座位係俾人坐嘅，唔係畀你啲戰利品坐㗎！
由大媽身後嘅玻璃見到，對面仲有空位，雖然車廂唔滿啫，都唔代表一個人可以坐兩個半位囉！根據《港鐵附例》，任何人都唔可以喺已付費區域內進食或企圖進食任何食物，違者可被罰款2,000港元。
短片引發網民熱烈討論，有人話「架車大把位，又影響唔到你。」更多人係不恥大媽嘅行為「掃晒佢啲袋落地」、「港鐵畀食嘢？」、「應該整個告示牌，指明坐位只供人類坐」，亦有人批評拍片者「點解只顧住拍片，唔通知港鐵。」
你敢爆，我敢獎！ 立即WhatsApp《蘋果》24小時爆相爆片熱線或致電：63836568
|
鍾意就快D Share啦！
|
|
|