由盧凱彤8月5日跳樓自殺到而家，已經過咗3個幾月，同Ellen相識多年嘅何韻詩，放低咗件事未呢？「其實我對於呢件事都真係唔想再講咁多，因為之前做好多訪問都無可避免，我都明白大家好關心，好想知道，但係我會覺得大家應該向前看，當然我哋有好多嘢在心中，我相信如果不停重提一件事，其實都會將自己困住咗，所以我希望大家都可以搵到一種力量，去衝破一啲嘢，然後向前看，點樣真係令我哋可以過得好啲。」
阿詩選擇積極面對，將傷痛化成動力，將亡友放在心底，過得好一點。「所謂過得好啲，唔係話要買好多好奢華嘅嘢，而係點樣對自己好啲呢？點樣對身邊嘅人關心、了解，可以做得更多。」Ellen事件，令唔少人反省，多關心身邊患有情緒病的人。「我身邊其實都有好多有情緒問題嘅朋友，呢個圈子其實係有好多，你唔會想像到係有咁多人都有咁多問題，而呢個我覺得係我哋呢個地方，慢慢咁多年嚟積落好多嘢，生活上、社會上，再加上工作，好多習慣性嘅嘢令到我哋無去照顧自己，而呢樣嘢係我哋真係要去面對，你再繼續咁樣逼自己埋牆角，而唔去正視呢個問題，只會愈嚟愈多人有咁嘅狀態。」
12月舉行演唱會《我們正在On The Pulse Of》，正就是阿詩想希望大家思考的人生課題。「其實我哋今次演唱會嘅命題，英文就係On the Pulse of，中文就係我們正在，其實都係關乎一啲咁嘅嘢，就係我哋忘記咗感受自己嘅脈搏，而個脈搏係好緊要，因為你好忙，有好多嘢發生緊，擔心緊好多嘢，你後悔緊好多嘢嘅時候，其實我哋成日會忘記咗呢一刻先至係最重要，呢一刻感受番自己嘅呼吸，感受番自己嘅心跳，跟住去了解番自己，我覺得呢個我哋講咗好多年，但只不過係一句口號，活在當下，其實係好難，但係要嘗試去做囉。」講一句活在當下好容易，真正做到嘅人又有幾多個呢？對阿詩嚟講，識得真正咁去呼吸一下，已經係好好嘅改變。「可能好簡單，每一日臨瞓前，只不過係呼吸，其實我哋都唔做，其實大家都唔記得呼吸，我都會咁樣，喺一個好忙嘅時候，所有嘢好繃緊嘅時候，但係其實好多情緒、好多病、好多各樣負面嘢就係咁樣嚟，有冇辦法去變呢？我覺得唔係一個人可以做到，真係要好多人同時嘗試去作出一啲改變，嗰樣嘢先會真正改變。」
攝錄：蕭敬漁
採訪：肥A、阿芝
來源 source: http://nextplus.nextmedia.com
|
鍾意就快D Share啦！
|
|
|
