惠英紅（紅姐）最近同姜皓文（黑仔）首次合作，在新戲《翠絲》中演兩夫妻，不過這對夫妻在戲中已經是分房瞓，行動上早已告訴大家，兩人已分居，並沒有夫妻之實。演過無數女人角色，紅姐如何演這個既是保守女性，但原來是跨性別人士的太太，可說是雙重考驗。
早前惠英紅在銅鑼灣接受訪問，談到這個在戲行中打滾的女子，如何演繹？她謂︰「我自己做咗啲資料搜集，首先佢係一個好保守嘅女人，加上佢嘅職業帶動佢嘅生活，做戲班嘅人好要面，怕自己冇面。」
談到她和黑仔一場攤牌戲，她坦言這場戲很深刻，「其實套戲嘅劇本我冇揸喺手，我只係睇自己嘅戲，因為戲入面嘅我，份人幾古板，從來冇接觸過跨性別人士，突然間老公咁，要離棄你，佢唔係有第二個，而係要同你做姊妹，好驚訝，心理上會處於咩狀態。」
事前紅姐跟黑仔及導演，商討過不會斬件式分開來拍，「我哋事前行咗啲位，攝影師hand held部機跟住我哋做嚟拍，一氣呵成。一個女人第一次同老公攤牌，呢個女人嘅性格出晒嚟，瞓落地撐晒腳係咁拍自己，當時我都冇預計到情緒係咁痛，拍完我塊面都有少少腫，我鍾意演得好生活化，好自然，拍嘅過程要提住自己。」
紅姐除了要演得生活化，她對自己亦有要求，好像戲中她演唱粵曲，導演、監製讓她自選曲目，「佢哋問我想唱乜，我諗喺一個茶聚小館，我揀咗唱男聲嘅《鳳閣恩仇未了情》，我以前經常唱女聲，今次揀男聲唱，想巧妙咁顯示呢個女人嘅性格。」但好可惜，拍攝時的第一稿由她自己唱，但現場收聲有雜聲，無奈棄用，要再找師傅為她配聲。
首次跟黑仔合作，紅姐大讚對方演跨性別人士夠突破，至於接觸跨性別人士，紅姐坦言在邵氏年代拍電影《掌門人》時，有一場戲找來成班跨性別人士演出，「佢哋個個都咁靚，佢哋嘅心路歷程，我都好熟悉，甚至我覺得佢哋仲靚過女人。」
採訪︰羅婉玲
攝錄︰廖達燊
形象︰Shiatzy Chen
場地︰香港銅鑼灣皇冠假日酒店
精選娛聞，喺晒《娛果》 http://fb.com/appledailyent
|
鍾意就快D Share啦！
|
|
|