有炒開股都知，有啲股票，你明知佢唔值，但食住升勢，人炒你又炒，邊個贏邊個輸，就睇吓音樂幾時停。炒股如是，做生意都如是。
近年Co-working space開到成行成市，個個老細嘅動機都好好聽，「希望幫助香港Startup發展，為香港未來出一分力。」係嘅係嘅，講到尾其實都係包租公。WeWork呢間，全球24個國家拓展業務，夠大未？但單係2017年，就蝕12.5億美金；今年頭三季，已經蝕12.2億美金。不過，唔怕呀，佢有軟銀做後台，今個月再注多30億美金，Bomb一聲，valuation已升到420億美元。
後台夠硬淨，當然唔怕蝕，最後水源唔充一開波就亂使錢。如果講內地Co-working space龍頭，就要數氪空間（Kr Space），進駐全國11個城市，今年亦已進軍香港，當日好高調咁公佈，會租用幾個甲級商廈，包括時代廣場、華懋One Hennessy，其實仲租埋K11，個個都係黃金地段，單係時代廣場，呎租都85蚊；One Hennessy就更加要94蚊。
好啦，租咁多，係咪真係食得住呢？話說，Kr Space都預租咗中環中心38同39樓全層，呎租95蚊左右，兩層加埋有成44000呎！嘩！好勁呀，做Coworking space可以做到中環嘅中心！不過，呢啲已經係過去式！有消息人士就話，Kr Space突然寧願撻一個月訂，都要縮沙唔租，有數得計，95蚊x44000呎，即係418萬！邊個沒收訂金？就係當日其中一個接李嘉誠貨嘅「磁帶大王」陳秉志。
呢單嘢，睇到幾樣嘢，講真，Kr Space今年先開始大手入市租Office，似咩呀？似460蚊摸頂入騰訊（700），騰訊下場係點，大家真係有目共睹，至於Co-working space，共享空間呢啲buzzword，似乎都要到尾聲。
第二樣就係，真係唔好輕易接李嘉誠貨，佢一大手出貨，就證明佢睇到啲我哋睇唔到嘅形勢。一班有錢佬，上年11月夾份用402億元接75%業權，依家有啲就沽都沽唔切，有啲就要轉按減息。好啦，有啲好彩嘅，搵到傻豬租客天價承租，諗住可以挾高租金回報，再同銀行講數「唔係呢，我做到呢個return，平啲息啦。」點知一個唔覺意租客都撻訂。
所以話，中環中心係好體現香港近年嘅情況，人人炒炒賣賣，有人高價接貨，有大陸商家氣勢如虹衝入來又輸住走，而最後贏家只有一個，就係喺音樂椅轉停前，及早散水嘅李嘉誠。
by千頌C@堆填區
http://fb.com/winbigwok
|
鍾意就快D Share啦！
|
|
|