周潤發（發哥）家姐周聰玲日前接受港台《舊日的足跡》節目主持車淑梅訪問，分享同發哥嘅姐弟情。玲姐經常會同朋友提起呢位令佢覺得非常自豪嘅細佬，除咗因為發哥憑努力成為一位國際巨星，光宗耀祖之外，仲係一個非常顧家、照顧家人、人品好、性格隨和嘅人。
玲姐話：「南丫島呢啲窮鄉僻壤出咗個國際巨星，我當然好開心，佢光宗耀祖。能衝出香港發展亦都係佢個人嘅努力，能夠去到荷李活，數埋香港冇幾多人。佢全世界嘅獎項都有，錢又有，今時今日仲攞埋四個字『反璞歸真』，要生活簡單並唔簡單，平凡中見不平凡，呢啲叫做超然、逍遙自在，佢昇華到活出咗般若智慧。」
蜻蜓攝影師玲姐本身亦過得好簡樸，佢仲話唔會因為有個巨星細佬而有壓力，因為每個人都有自己嘅生活方式。為影相經常周山跑嘅玲姐，同發哥都係攝影發燒友，發哥晨早五點就會起身，試過去大帽山影晨光第一線，近年就愛上跑山，好多市民都以山頭野生捕獲發哥兼自拍為目標，玲姐笑話因為發哥手夠長，最鍾意同大家自拍：「發哥仲話戲迷係佢嘅米飯班主，所以會視佢哋如家人一樣打成一片。」
發哥重親情，對於發哥為佢置業，玲姐坦言心中有一句說話好想對細佬講：「我想講無言感激，一個親人照顧得自己咁好係一種福氣，好感恩。每個星期屋企人都會出嚟食飯、飲茶，都係由佢召集兼買單。對於佢人生中遇到嘅唔如意事，我唔會出聲，甚至唔會打電話畀佢，因為佢身邊有好多顧問、精英、高人，我畀佢安靜已經足夠。」
玲姐大發哥八歲，但兩姐弟好投契，又鍾意講笑，玲姐自爆有次用咗《Happy Birthday》首歌做電話鈴聲，點知發哥一聽到就叫佢唔好再用，因為有啲場合唔方便，例如有人喺靈堂三鞠躬，電話突然唱生日歌實畀人炳。
發哥講過將來百年歸老會將所有身家捐晒出去，玲姐亦都好贊成，佢認為能夠做善事，令更多人受惠係福報，好似諾貝爾一樣，呢種博愛精神係永垂不朽，佢話:「有錢要回饋社會，一個人叻有咩用，世界係應該共融。我今年71歲，媽媽都已經97歲，我再冇咩特別追求，因為精英向前衝，耆英退一步海闊天空，我只希望能日日好時光，快樂又健康。」
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|