「同任何一個業主嘅關係搞到呢個地步，都係一件醜事嚟。」
亞洲聯合基建（711，前稱俊和）行政總裁及營運總裁彭一邦所指的，
便是兩年前俊和跟長實（1113）因大埔慈山寺工程問題鬧上法院，
結果長實要向俊和賠償近億元工程費；
作為能成功在首富李嘉誠手上取得一億的男人，
彭一邦認為沒甚麼值得炫耀，
「話晒對方都養大我哋。」
更透露因此事令俊和接少了對方的工程。
記者：陳新政
攝影：何耀勤
長和（001）前主席李嘉誠出資17億元興建的大埔慈山寺由俊和承建，惟兩年前遭俊和追討2億工程費尾數，法庭判詞認為長實對工程提出過份苛刻要求，證人透露指，單是以色列訂做的防彈玻璃窗戶改動6次，結果法庭判俊和獲賠償逾9,700萬。彭一邦表示，俊和過去未曾跟任何一名業主打過官司，形容慈山寺官司是一件醜事：「講真係唔值得，同業主搞到咁都係醜事，希望嗰單官司係第一單，都係最後一單。」他又坦言，俊和創立之初曾靠長實的工程成長，「長江某程度上養大我哋公司。先父同長江關係好好，我諗要飲水思源。」他明言已接少長實的生意，「都冇辦法，希望時間可以解決一切。」
業界生存空間縮窄
事隔兩年，彭一邦再提起這件事，主要是看到本地企業在業界的生存空間不斷收窄，他舉例子，以金額計，過去香港大型基建工程招標，如沙中綫、高鐵、港珠澳此等千億工程項目，港資公司能參與項目只佔約16%：「而且係部份參與，唔係全資負責喎。」
同時，政府項目計分制，要睇過往紀錄：「即係你以前有造過橋，未來先接造橋嘅工程，海外公司嘅經驗又可以評分，咁中小企永遠都冇得參與，𠵱家接到工程嘅港資真係5隻手指都數唔到。」他形容本地承建商入標就像「拎住士巴拿去踢波」，你不接受，其他公司亦會爭住做：「唔做東家，就真係得番西家，而我哋目前就承受緊呢個痛苦。」
除了政府工程制度，本地搶人文化及業主條件苛刻，令縮窄建築商生存空間，例如行規會將工程完結日期預先提早3個月以上：「呢個係陋習，其實係想逼個承建商盡快起貨，遲咗就罰款。另一方面，每次有新工程，就會加一成人工搶人，到下個月有新地盤，又再搶對上一個地盤嘅人。」
自己有責任發聲
他又以黃埔站工程作例子：「黃埔污水系統有幾十年冇維修過，啲污水管經常穿，污水噴出嚟，同事要繼續趕工，我每次着西裝落去，都踩住啲屎水，喺好嘈嘅重型機械聲中同啲同事溝通，可想而知有幾惡劣，好多同事之後仲有皮膚病。」
在新聞鏡頭上，俊和親政府的立場成為眾矢之的，彭一邦苦笑指：「會唔會又俾人鬧，尤其同你哋做訪問。」彭一邦曾在美國執業4年，2001年回港，至今21年，他做事要求仔細及有計劃，就連訪問準備都一樣，但鏡頭一開，他便滔滔不絕，不會跟劇本講嘢，他認為自己有責任發聲：「社會同企業要進步，意見無論啱與錯都應該要表達，我選擇咗拎出嚟講，我都預咗被人鬧，例如喺鍵盤裏面講嘅，我都習慣咗，希望大家講啲可以負責任嘅說話。」
彭一邦的辦公室十分簡潔，牆上掛起一幅照片，是他的攝影作品，「我用A7RIII，因為quality最好，旅行會用Olympus，方便用慢快門。」攝影玩了逾十年，今年為俊和成立五十周年，公司承建的工程便是他鏡頭的model之一，他更成立Lifewire「護‧聯網」，將作品拍賣，多年來籌得兩百萬善款，支援特殊病病人。
what's your MOTTO?
「作為公司之首，有責任講出事實真相，不敢講才是最大問題。」
|
鍾意就快D Share啦！
|
|
|