圈中喜事不斷，再添一個豬BB！黃澤鋒前晚在fb報喜將首度做爸爸媽媽，宣佈下月踏入52歲的太太陳麗麗在去年底懷孕，正陀B三個月，預產期是7月。黃太以52歲超高齡陀B，見到老婆辛苦，黃澤鋒也將最辛苦的事都孭上身：「太太陀住BB冇乜氣力，出入都車佢。」他更會努力賺奶粉錢，直言所有工作都會接。
相關新聞：【飛魚之子】渡海泳冠軍變拳證
現年51歲的無綫前藝人黃澤鋒，在10年迎娶圈外女友陳麗麗，兩人新婚時一直恨生B，現在終於願望成真。黃澤鋒前晚在fb報喜，貼出一對粉紅色初生嬰兒手套，並留言：「1+1=3，2019願望成真，以欣喜之心迎接新生命的來臨，一家三口。」其實黃澤鋒太太陳麗麗下月已屆52歲，成為超高齡產婦，風險甚高。
黃澤鋒昨日在電話中興奮回應：「真係多謝你，咁嘅年紀做爸爸。我哋都唔細，有一個家庭就完整啲、開心啲，我有教小朋友，佢哋有曳有乖一面，我哋都鍾意小朋友，今次有真係好開心。」
| | |
自然受孕
「準豬爸」黃澤鋒昨午2時許，做柴可夫載太太到沙田威爾斯親王醫院做產檢，近日天氣轉涼，黃太也包到冚到醫院，並戴上口罩防細菌。大概兩個多小時後，兩人離開醫院，記者上前恭喜，黃澤鋒夫婦即開心笑唔停。問到他們是否人工受孕？黃澤鋒指是自然受孕：「唔係，最大原因我諗係太太6月辭咗職，佢休息好夠就容易有孕。其實我哋結婚頭幾年有諗生BB，但呢五、六年就冇諗，越緊張越冇，呢次有咗係好surprise，BB係上天嘅禮物。」
黃太陳麗麗以52歲超高齡陀B，除了聽醫生話會多休息，黃澤鋒也會特別照顧太太：「我仲叫佢唔好拎重嘢，佢話上樓梯都辛苦，我先明白阿媽陀我時都辛苦。」黃澤鋒續說：「見太太陀住BB冇乜氣力，出入都車佢，聽講呢段時間最麻煩，醫生話過咗呢段時間好啲，小朋友同大朋友都關我事。我呢排好忙，另一方面要搵奶粉錢，又勤力做嘢，所以有job都接，如果大家聽到我呼籲，畀多啲job我，搵多啲錢養小朋友嘛，太太教緊泰拳班我接手，雖然辛苦，但辛苦得嚟好開心，迎接一個新生命，對於我嚟講應該唔同咗。」
相關新聞：【得來不易】林青霞47歲產女險難產
唔怕代溝
黃澤鋒51歲才生第一胎，可會擔心將來跟孩子有代溝？他表示：「我𠵱家都有教細路仔，有3歲小朋友，溝通上冇困難。」至於添丁會否打亂二人的退休計劃，黃澤鋒直言不言休：「冇諗退休，我教拳可以教一世。」黃澤鋒透露太太目前懷孕剛滿三個月，至於在fb貼出粉紅手套相，並不是暗示生女：「未照到BB性別，啱啱先夠三個月，預產期今年7月，之前要預備啲嘢，我未做過爸爸，同新手冇分別。」
採訪、攝影：比華利、梁繼光
【高齡注意】小心飲食 補充葉酸
黃澤鋒太太陳麗麗以52歲超高齡懷孕，婦產科醫生藍寶梅昨接受《蘋果》電話訪問，表示超高齡孕婦在懷孕期間要特別留神：「呢個年齡有孕，真係得來不易。要留意胎兒患上唐氏綜合症風險會比較高，都要注意妊娠糖尿同高血壓。」
對於黃澤鋒指太太陀B易攰，藍寶梅續說：「孕婦乜嘢年紀都易攰，畢竟年紀大，體力大打折扣。」問到高齡產婦要注意事項，藍寶梅答：「留意葉酸嘅補充，飲食均衡，唔好食雪糕同飲咖啡，小心飲食。」以陳麗麗情況，適宜剖腹還是自然分娩？藍寶梅說：「多數會揀開刀，但自然分娩都得，要睇懷孕後期先決定到。」
|
鍾意就快D Share啦！
|
|
|