日前已經低調復工拍電影嘅劉德華，原定去年12月15號喺紅館舉行一連20場跨年演唱會，點知演唱會舉行到第14場，華仔喺開騷後不久，忽然含淚宣佈因為身體不適，演唱會要即時腰斬，幸好歌迷都好體諒同愛錫華仔，個個為佢打氣，可惜華仔經醫生確診患上流感後，餘下嘅6場騷都要取消。
為免歌迷失望，華仔今個月初，透過其公司映藝文化娛樂發聲明，宣佈入紙紅館申請年底嘅跨年檔期，講明最遲會喺今個月31號公佈申請成功與否，點知唔使等到月底，今日華仔方面已經正式宣佈，申請跨年檔失敗！
呢個消息，對於一眾華仔迷嚟講，絕對係一件傷心事，但係有人歡喜有人愁，對陳奕迅（Eason）同佢一班歌迷嚟講，就肯定係好消息。事關，今日華仔收到申請失敗嘅同時，據知Eason方面亦已經收到申請成功嘅消息。
據知，Eason早已交齊文件同紅館申請今年嘅跨年檔，亦公開表明對呢個期好有興趣，甚至開到口叫老友謝霆鋒讓路，叫霆鋒如果要開紅館騷都揀農曆年檔，唔好同佢爭跨年檔，只係人算不如天算，最後同佢爭檔期嘅人，竟然係劉天王，令本來勝券在握嘅Eason，擔心咗接近三個星期。
知情人士透露，Eason一直對於申請年底嘅紅館期信心十足，因為佢知道鄭秀文、郭富城，甚至闊別紅館八年嘅黎明，即使今年喺紅館開騷，心水檔期都唔係喺年尾，所以佢可以喺冇對手之下自動「當選」，o依家就真係飲得杯落喇！
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|