《愛．回家》上位小生何君誠，離開無綫半年，決定唔再做演員，去蒙古開牧場、旅館，希望做生意賺錢，可以俾好啲生活爸爸媽媽。唔知佢提出離開時，無綫有冇加人工挽留佢呢？「公司無加我人工，但係有挽留我，金錢係一個好重要嘅問題。」08年參選港男入行嘅佢，唔經唔覺，原來已經入行10年，啱啱捱出頭，公司開始俾機會就決定離開，會唔會好唔抵？「啱啱過咗嗰啖氣，你唔會知道，無人會話俾你聽，無問題，下個機會都係你嘅，無人會咁樣對你講，你都係會驚，而你亦都見到做緊嘅工作，唔係被力捧緊，所以就縮一縮」何君誠離開後，有同事打電話問佢點解走，叫佢返去再簽番佢，不過，心態已經唔同咗嘅何君誠，婉拒咗對方嘅好意。「叫我簽番約，但始終因為已經離開，心態唔同咗，到最後一日仍然矛盾緊會唔會留低，但當你一走咗，再重新傾過嘅時候，我當時嘅選擇就係有自己嘅發展，你等我安頓好所有嘢，先再考慮返唔返嚟，當時我嘅回應係咁樣。」離開嘅原因當然同「錢」有關，就算連挽留都唔加人工，留低又有咩意思？「因為心裡面最大嘅包袱其實係家庭，所有決定嘅第一點，都係由家庭出發。尤其是我做呢一行，你要心痛自己嘅工作，入TVB頭一年，我係連三千月薪都無，啲錢真係只夠食飯搭車，當時未簽經理人合約，可以做吓模特兒工作，又試過做冷氣工程，又試過整
車，要不斷搵辦法維生，但只係足夠維生。」
咁嘅生活，佢捱咗四、五年，為嘅係滿足自己嘅任性，追逐演員夢。「因為任性，爸爸媽媽一直都無逼你要對屋企有咩責任，喺自己心裡面就會有條刺，而一日一日見到爸媽變老，記憶同身體開始變差，我好坦白，媽咪喺我廿幾歲嘅時候患過一次重病，令我有一個體會，人生唔係奉旨會仲有十年命，唔係奉旨有二十年命，有機會出年突然間就會離開，所以喺我心目中想做一件事，就係喺我有能力，或者而家有發展空間，可以賺多啲錢，我想佢哋會有機會享福，呢個係我心裡面想做到嘅事。」除咗錢之外，睇唔到前景亦係離外嘅原因。「香港電視業其實退步緊，就算我唔轉行，要喺電視業、演藝界發展，我喺一個退步緊嘅市場工作，定係想辦法跳去最前線市場搏一鋪，喺嗰個定義裡，令到我都想離開。」何君誠雖然離開咗無綫，但佢嘅圈子離唔開圈內班朋友。「其實好難唔一齊，畢竟工作十年，讀書時期嘅朋友只係剩番一個，全部朋友都係演藝圈，其實已經無分別，離開之後都係同番佢哋一齊玩，佢哋亦都覺得我唔會離開呢個圈，覺得我遲早都會回歸，只不過而家有啲新方向咪嘗試一下，有機會一定會回歸，有機會做主角唔通你會唔拍？即係某程度上，我都覺得自己會回歸，呢一刻就先做好牧場呢件事。」
攝錄及攝影：黃志明
採訪：肥A
來源 source: http://nextplus.nextmedia.com
|
鍾意就快D Share啦！
|
|
|