余文樂、陳曉東兩位型佬，閒時shopping有共同嗜好，鍾意行同一款店舖，係啲乜？相信大家未必估到，童裝呀！
人哋話做咗老竇之後會成熟咗，或者係真㗎。余文樂而家出街好多時都係同老婆一齊，唔係行名店、買潮牌，反而睇小朋友衫仔，仲落手落腳去揀款，做咗老竇真係唔同晒。
會行童裝店舖嘅型男嚟計，除咗余文樂，仲有陳曉東。同一日，同一地點，同一時間，仲有陳曉東一家四口。佢兩個女大咗好多，識行識走連衫褲鞋襪都識得自己揀，仲著住一色一樣嘅服裝喺店舖入面彳亍咁轉，而一身牛仔look好有型嘅陳曉東就拎住杯飲品，單手插袋，跟喺兩個女身後𥄫實。兩個女明顯好黐爸爸，睇啱嘢會即刻通知爸爸，離開時又會跑上前主動拖實。前世情人真係冧死人，難怪陳曉東再忙再攰，返到屋企都甘願為兩個女做牛做馬任佢哋騎啦。
陳曉東之後見到余文樂身影，主動上前打招呼。見到前輩，樂仔即刻四萬咁口講新年快樂，又點晒頭、鞠晒躬，好有禮貌。
來源 source: http://nextplus.nextmedia.com
|
鍾意就快D Share啦！
|
|
|