2019年2月28日 星期四

娛樂專題:想試全裸土耳其浴 江嘉敏畀飛來蜢嚇親 __,江嘉敏,

藝人江嘉敏(Kaman)與閨蜜劉穎鏇(Tiffany)早前結伴到土耳其工作兼旅遊,兩位靚女沿途艷福不淺,頻頻獲當地男士飛吻及單眼示好,不過Kaman坦 ...


藝人江嘉敏(Kaman)與閨蜜劉穎鏇(Tiffany)早前結伴到土耳其工作兼旅遊,兩位靚女沿途艷福不淺,頻頻獲當地男士飛吻及單眼示好,不過Kaman坦言無福消受,反被他們的熱情嚇怕而急急閃人。

早前江嘉敏孖劉穎鏇到土耳其拍攝旅遊節目《3日2夜》,實行寓工作於娛樂。兩人在當地逗留十四天,遊覽了伊斯坦堡及以奇石著名的卡帕多奇亞(Cappadocia)。

Kaman認為兩個地方都各有特色,伊斯坦堡適合喜歡觀光的朋友,當地有不少清真寺及教堂,每間都有獨特建築色彩及歷史背景,當中以藍色清真寺及聖蘇菲亞教堂最為出名。

專人侍候脫毛浸浴

來到土耳其,兩人都有一嘗土耳其浴,Kaman自爆之前對此有不少謬誤:「我之前上網睇,見到沖土耳其浴嘅地方係用白雪雪嘅雲石,我以為啲雲石係涼浸浸好舒服,點知入到去有啲似香港焗桑拿咁,好熱、好焗,我起初唔係好慣,入面一個窗都冇,個天花板只得一個好細嘅窿,基於拍攝所以我哋着泳衣,但正式係唔着衫畀一個唔着衫嘅姨姨去服侍你,由頭洗到落尾,仲會幫你清理埋全身毛髮。」她揚言將來有機會也想來個正式土耳其浴呢!

伊斯坦堡太重口味

而自認貪吃及貪玩的Kaman就更鍾情卡帕多奇亞,她解釋:「卡帕多奇亞嘅食物口味比較啱香港人,相反伊斯坦堡嘅嘢食就比較重口味,會用好多調味料,無論甜、酸、苦、辣嘅味道都係超級。當地好多人唔食豬,只食雞、牛、羊,如果接受到羊嘅羶味會鍾意食,但日日咁食,我連自己隻手都散發咗啲羶味出嚟。而且卡帕多奇亞仲可以玩越野車同坐熱氣球添!」

洞穴酒店睇熱氣球

除了食物外,Kaman還很喜歡卡帕多奇亞的洞穴酒店,酒店由岩洞改建而成,裏面採用天然日光,只有小量燈源,氣氛很好:「每間房都係一個洞穴,有啲房間好大可以媲美總統套房,而且酒店老闆好好人,每日都會煮早餐畀我哋食,又會介紹我哋去啲靚景點影相。」

兩人還在酒店天台欣賞日出及漫天熱氣球徐徐升空的壯觀美景:「我哋凌晨就起身等日出,每朝清晨都會有好多遊客坐熱氣球,見到成個天都係彩色繽紛嘅熱氣球,真係好靚又浪漫。」

叔叔埋身狂派飛吻

講到最難忘,Kaman坦言土耳其人的熱情令她留下深刻印象:「記得有次我哋要搭船由舊區去新區,等上船時個碼頭好逼,多人到要心口貼背脊咁行,當地人好熱情,男人見到女仔會不停咁單眼同飛吻,因為我好細粒,所以Tiffany就保護住我,Tiffany話見到我身邊嘅土耳其人不停向我單眼,同埋想行埋我身邊認識我,之後上到船,我見有好多土耳其叔叔不停向Tiffany單眼,我哋都笑佢有艷福,因為Tiffany好有禮貌,人哋向佢飛吻同單眼,佢會好有禮貌咁點頭回應,你畀反應人哋,人哋可能會有進一步行動,我就好驚,一見到佢哋咁,就即時閃走。」


來源 source: http://hk.on.cc
鍾意就快D Share啦!
Related Posts Plugin for WordPress, Blogger...