葉德嫻（Deanie姐）近日為運輸署拍攝的宣傳片在網上熱播，片中她直斥無禮乘客令人大快人心。歌影紅人Deanie姐平日搭港鐵時，都遇過不少劣品乘客，曾因忍不住直斥其非，反被對方鬧「死八婆」。她慨嘆港人和內地人一樣都有質素低的乘客，令她感到很失望：「人嘅質地原來可以低到咁樣。」
現年71歲的葉德嫻向來敢言，最近她接受運輸署聯同港鐵及巴士公司邀請，拍攝一條約三分鐘的宣傳片。片中，Deanie姐全程鬧爆劣品乘客，推廣「搭車顧自己，都要顧人哋」的訊息，獲不少感同身受的網民激烈讚賞。
在鏡頭前鬧到句句到肉，原來Deanie姐都試過「身受其害」，搭港鐵時遇到劣品乘客，阻止男乘客飲水反被鬧。她前日接受《蘋果》電話訪問時說：「我行埋去同佢講：『先生，港鐵唔可以飲食。』就俾佢睥我啦，鬧我死八婆。」她更曾目睹一家四口在車廂食快餐：「我行埋去同佢講：『太太，港鐵唔可以飲食。』佢話：『咁細路仔肚餓吖嘛！』我惟有話：『好呀，你教得好！』」
Deanie姐又再指出劣品乘客的其他缺德行徑：「好多女士長頭髮，喺人多時會揈頭，唔會理後面有冇人。」不過，最難接受還是有病不戴口罩：「例如唔掩口喺度咳、打乞嗤，佢哋好似唔覺得呢啲係問題，反而覺得你應該可憐我：『我咳呀！』」Deanie姐越講越勞氣：「又例如有啲人坐喺度蹺腳、伸隻腳出嚟，你諗吓個位有幾闊呢？如果同佢講：『麻煩你唔好蹺腳，畀番少少位嚟！』咁佢又會畀說話你聽：『咁我生得高嘛！』」
至於令Deanie姐覺得尷尬的是乘客撩完鼻屎四圍彈：「佢可能唔知彈咗去邊，呢個我冇出聲，因為真係太過尷尬。有啲女人好得人驚，生得好靚、手甲搽到好靚都喺度撩㗎，呢啲係好難頂。」身為長者的她表示關愛座及輪椅位被濫用：「有啲人唔會讓座畀婆婆坐，瞌埋眼扮瞓覺。仲有啲離譜到企喺輪椅位，啲輪椅上到嚟佢哋唔行開，等輪椅嗰個人蕩嚟蕩去。」
對以上種種，Deanie姐坦言失望：「人嘅質地可以低到咁樣，都係大人大姐，睇到呢啲你會覺得：弊弊我哋個係乜嘢社會，有啲咁嘅人出嚟！」有網民提議再拍普通話版給內地人看，Deanie姐表示港人跟內地人一樣低質：「我覺得咁樣唔啱，你可以配音，但配得國語就要配埋英文，因為我認為並非內地人係咁，我哋香港人都唔差㗎，大家都係衝入車去霸位，絕對唔可以話嗰啲只係內地人。」
短片出街後，不少網民同聲讚好，亦有網民大嘆「有幾多人好似葉小姐咁會見義勇為吖。」不過曾支持佔中的Deanie姐卻被親建制網媒狙擊，指她在片中「態度傲慢乞人憎」，又反問「佔中不屬於自私行為嗎？」指摘政府選角不當使用公帑。運輸署表示，葉拍攝三天並無收取報酬。
精選娛聞，喺晒《娛果》
http://fb.com/appledailyent
第二屆最港電影大獎投票網址
https://bit.ly/thekongestfilmawards2018
10萬蚊 100人分！
星期一至五晚上10點半
《動腦Q》Let's Q the money！
http://bit.ly/2QW8LcI
|
鍾意就快D Share啦！
|
|
|
