藝員被點錯相不時都會發生，例如連視帝陳展鵬都被撐警大聯盟認錯做朱經緯咁大台咪神陳婉衡被認錯為呃人成球嘅電話女騙徒，仲搞到上埋差館，又有咩咁出奇呢？
是咁的，日前陳婉衡如常搭地鐵去上跳舞堂，期間有個麻甩佬走埋去話陳婉衡爭佢錢，呃咗佢百幾萬。全程用電話跟住拍片之餘，又唔俾陳婉衡離開。警察嚟到之後就覺得好困惑喇，事關報警嘅係男方，但陳婉衡反而喊到震晒似係受害者。最後擾攘咗幾粒鐘，去埋差館先發現係點錯相，真係無妄之災。誠如網民話齋，如果唔係個男嘅主動報警，真係有奶油相信佢係扮晒蟹博懵抽水㗎，話晒陳婉衡係港版Julia喎，E喎！
同日，《壹》仔撞見陳婉衡，或者受點錯相事件影響，今次有個高大猛男陪同。期間二人有傾有講幾投契，而陳婉衡睇落亦無啲咩受驚過度嘅問題，只係素顏感覺有啲口腫面腫，而且警覺性都相當高，好快就察覺到有鏡頭影住。又難怪嘅，無啦啦俾人點錯相嚇餐死，變成驚弓之鳥都好正常。
來源 source: http://nextplus.nextmedia.com
|
鍾意就快D Share啦！
|
|
|