王梓軒是創作歌手出身，輾轉到無綫拍劇和做主持，現在演員身份，可能強於歌手本業。今年是入行十週年，他說：「十年時間話無低谷就一定係呃你嘅，我諗我哋每一年都可能有一兩個低谷。」
心情低落時會怎宣洩？男人不哭？
「都會喊嘅，嗰段時間我係覺得自己做乜嘢都唔叻，音樂方面好似做唔到好成績出嚟，主持表現又好生硬，演電視劇又好似傻佬咁樣。嗰段時間我覺得自己乜嘢都唔係，咁我係乜嘢呢？自己嗰種惆悵，我只可以話畀自己知一樣嘢，表面上睇嚟好似好迂迴曲折，兜咗好大個彎，但其實呢啲全部都造就緊自己。」
以唱歌為主，其實不可能。
「咁多年嚟我賣得最好嘅唱片，係我第一張唱片，因為當時仲有人買唱片，之後啲歌大家可能會比較熟識，但都唔夠第一隻碟好賣，呢個係我第一樣要面對，原來做歌手係會咁樣嘅。」
他曾被日本Avex睇中，到當地發展，可惜11年福島事件，他要無奈返港。
「日本整個國家嘅娛樂事業暫停超過一年，當時公司一定要裁員，佢哋無裁我，但裁走我成隊人，我就坐咗喺度，唔知可以做乜。於是就返香港繼續歌唱事業，但係好困難，唱片方面係好困難，離開咗一段時間，大家要重新接受我又難。」
轉做演員也不易，尤其初拍劇時的生硬。
「會感受到拍攝團隊有不滿，佢哋唔會哦你嘅，好專業嘅，但我會感覺，感覺到阻緊其他人。我好好彩，對手都好好，佢哋扶我起身，我用咗三年時間去搵番信心返嚟。」
由於出身富裕，父親王英偉是金沙中國總裁，他曾被標籤靠父蔭。
「只係少部分人咁睇，因為觀眾真係睇到我從低做起。當然可能有啲人會問，其實你問屋企借錢，或者佢哋畀機會你咪得囉，我諗屋企嘅家教就係，就算可以都唔會畀我囉，因為咁樣其實係害你。」
十年過去，改變最大的是他自己，從前他覺作為創作歌手是提供作品，找一些新穎的表演方式去刺激觀眾。
「現在我覺得自己係嚟服務觀眾，要搵唔同方法去服務佢哋，唱唔唱歌或者任何表演形式都唔重要。」
髮型：Jimmy Chan @ Hair Culture
服裝：Neil Barrett
來源 source: http://nextplus.nextmedia.com
|
鍾意就快D Share啦！
|
|
|
