有人都說當模特兒「保鮮期」有限，去到某個年紀，不轉型亦沒出路。入行二十多年的陳嘉容，絕對有足夠份量為業界平反：「做model有個優勢，就係見好多好嘢，我哋識揀、識分析咩係好同靚。」她指外國亦有八十多歲的模特兒，陳嘉容笑謂：「只要我keep到，又有客搵我就冇問題啦。」
早前，陳嘉容創立自家Lifestyle公司，問她是否轉型？她說：「唔止做model，就算你哋做記者都會轉，好多人都話做幾多年就唔做，我就好享受做model，好鍾意睇到唔同嘅嘢，人要不停學習，我唔會畀自己停，所以唔係刻意去轉型，對我嚟講係想有新挑戰。」她直言，現時做生意的知識與眼光，很多時都是來自模特兒對美的觸覺：「我有聽過，做model淨係生得靚、着得靚就得，唔使有腦，識個人嫁得好就得。的確，有啲人會揀結婚生仔就好開心，但我唔係，我係好努力去學習，想要踏出第一步。」
陳嘉容去年花了三百六十五天的時間，由構思、籌備、投入生產到建立網站，終於推出自家品牌Primee，她說：「成件事投資咗近七位數，正式launch咗三個月左右，暫時已經回本，以新品牌嚟講，算係唔錯。」回想當初，為何有意創立自家品牌？她笑謂：「做model，着完會除低，只要學識個trend同質料就得。做生意好唔同，買料、設計、實際運作都要知，我係鍾意靚嘢，所以我一定要做靚嘢，但又想做個合理嘅價錢，畀大家都可以享受到，提高大家嘅生活水平。而家做cashmere（羊絨），唔只係摸落舒服就得，連幾多針去織都要知。我一直都好鍾意冷衫，曾經試過着一個品牌，着嘅時候直情感覺到咩叫『when you try the best，you never go back』，我又鍾意同人分享我覺得好嘅嘢，有人去follow會好開心，好似cashmere咁，如果乖乖聽我話去清潔，一定可以着好耐。」
做生意，最大的成本就是店租，因此陳嘉容亦選擇先開設網上店減低成本：「大家都知香港租金有幾昂貴，我唔想花資金喺呢part，如果有日我afford到都可以考慮。而且online係趨勢，因為網上買嘢真係超方便，我成日都finger shopping㗎。」至於創業期間最大的困難？她直言是溝通：「宣傳都有marketing同事，我都會用自己力量周圍同人講，雖然公司得五個人，大家都有份工作，呢個係side business，但係大家喺呢度都有自己負責嘅崗位，所以運作上好順利。反而係同廠商去討論先難，為咗收靚啲嘅價錢，品質上就會有少少犧牲，可能係個款唔可以咁花巧，又或者唔用最高嘅針數，不過香港人同中國廠商，始終有文化差異，開頭嗰陣真係有溝通問題。做生意要諗多好多嘢，又要成日開會，真係白頭髮都多咗，要去染下髮先。」
採訪：盧妹
化妝：Kaman Leung
髮型：Derrick Ng Of The Muse Hair
場地：Parfumerie Tresor
《蘋果動新聞》訂閱新世代，4月開始免費訂閱，現在接受登記！
http://bit.ly/2Ja3IXw
全港打工仔特約：Lun廚動腦Q
加開1:30pm
3月11至22日
星期一至五1:30pm 10:30pm
http://bit.ly/2IZA8Ef
|
鍾意就快D Share啦！
|
|
|
