洪欣微博依家得番幾張有老公張丹峰嘅相。
女星洪欣同老公張丹峰舊年傳出婚變傳聞，當時有指「小三」係男方經理人畢瀅，尋日張丹峰再被圖文並茂爆出同畢瀅喺酒店密會3小時，雖然張丹峰所屬公司工作人員話「很正常」，仲指係「捕風捉影」，但曾為老公澄清嘅洪欣今次冇再回應事件，仲喺微博取消關注畢瀅。事件爆發後，網友發現洪欣靜靜雞刪除晒同張丹峰嘅合照，往日放閃晒恩愛嘅貼文已經唔見晒，成個微博只得番三張相係有張丹峰，其中一張係2016年為阿仔張鎬濂慶生嘅一家四口合照，另外兩張就係一家人舊年7月同畢瀅一齊去主題樂園玩嘅合照，唔知係咪有咩用意呢？
此外，有網友搵番內地藝人大張偉曾經喺節目爆料，話張丹峰對住鏡頭就成日話好掛住老婆同仔女，但係一拍完節目就唔會再講，雖然佢之後即刻補充係講笑，話張丹峰鏡頭後都有同佢講掛住仔女，不過網友都覺得真相隱藏咗喺笑話入面……
而一個疑似係畢瀅嘅社交網帳號亦被網友起底，發現該帳號曾經喺舊年嬲爆發文：「矮小黑？甚麼時候你才能徹底屬於我？我真的不想再看見她出現在你身邊。我知道我很自私，這輩子我只自私這一回，可以嗎？」更指對方曾話過會離婚娶佢，又話：「天天看着他和他很老的老婆在我面前秀恩愛，比殺了我都難受！」直言男方老婆係老女人！雖然話呢啲發文套用喺任何人身上都得，但有心水清網友指張丹峰曾經喺節目入面親口用「矮小黑」嚟形容畢瀅，認為呢個帳號好大可能係畢瀅所擁有。
----------------------------
東網巨星開咗ig喇，大家快啲follow
https://bit.ly/2JjSVcr
來源 source: http://hk.on.cc
|
鍾意就快D Share啦！
|
|
|