洪天明同周家蔚結婚之後真係定性咗好多，特別係生咗兩個仔做埋老竇之後，一有時間就過family day，而氹小朋友嘅最佳方法，莫過於同佢哋去買玩具。
洪天明長期喺外地工作，一走就兩、三個月，但每次回港都只得三幾日，所以佢經常慨嘆兩個仔大得好快，次次見親佢哋都覺得同上次見唔同咗。
天明細個嗰陣，洪金寶忙於搵食好少見面，仲要請人湊細路，天明講過唔想好似老竇咁，希望小朋友由父母親自湊返，所以周家蔚主力湊仔，天明一得閒就返港團聚，好似片中所見咁，一家四口出動，兩公婆亦分頭行事，周家蔚去COVA買蛋糕，天明就去買玩具。
天明錫兩個仔錫到燶，經常都買好大袋玩具，仲會落手落腳玩埋一份，見天明手中戴上復仇者反派魁隆嘅手套，相信兩個仔返到屋企就會扮Iron Man、美國隊長等等，同老竇對打。
雖然有好多新玩具，但小朋友最渴望都係有父母陪伴，所以細仔洪竟琋會吼準機會，向爸爸撒嬌扭抱，天明就梗係投降照抱啦。
有小朋友之後仲有個好處，就係洪金寶、洪天明兩父子都見多咗面，因為洪金寶會成日上佢屋企探孫仔，大家會因為小朋友而團聚多咗。據聞洪金寶仲開到口想要個孫女，而周家蔚都有意追多個女。咁天明陪完兩個仔玩完，都要抽啲時間同老婆玩下喇！
來源 source: http://nextplus.nextmedia.com
|
鍾意就快D Share啦！
|
|
|
