台灣剛通過同性婚姻合法化，成為亞洲第一個同性婚姻合法地區，而3日後的香港，一個國泰男男拖手的廣告傳被港鐵及機管局拒登鬧出風波，多元同行的世界仍然有不少阻力，而王敏德與馬詩慧的大女王曼喜（Kayla），亦貼出一張與女友人拖手的圖片作無聲抗議，Kayla近年積極參與爭取平權，亦活躍參加本地平權組織「大愛同盟」的活動。
26歲的Kayla於14年「出櫃」，日前公開孖拍拖1年的女友Anne出席同性平權活動，她絕對是一個敢於認愛的星二代，她身上有不少紋身，其中右手臂上紋了「Love never fails」，因感受身邊很多愛而有感而發，亦代表她人生的金句。Kayla早前在灣仔開了她人生第一個攝影展，以「intimacy」為題材，在她的鏡頭下捕捉了5對同性戀人臨睡前一刻的「床照」，話題性十足，她表示：「每一對情侶，尋找緊愛嘅時候，都係想搵到『家』感覺，一種溫馨感覺，而我就覺得每一晚可以同伴侶瞓同一張床時候，無論你做緊咩都好，可能傾偈、真係瞓着覺、打緊機、用緊手機，我都覺得呢啲moment係最親密。其實，我覺得每一對情侶，無論直定攣，都係會有呢種渴望、感覺，都希望搵到一個伴侶令你feel at home。」
提到家，Kayla與家人關係密切，由於是大女的關係，父母對她就稍為嚴厲一點，以前出夜街10點就要返到屋企，又不准去同學屋企過夜，相對她的一對弟妹就寬鬆得多：「佢哋兩個都有惡嘅位，我哋細個時候，媽咪睇學業成績嘅位重啲，我哋唔讀書、懶呀，佢就會發嬲，佢以前會收咗我哋電腦同電話，而家唔可以打小朋友，但係爹哋反對出街，出夜街唔知識咩人，跟錯人，唔好habit，呢方面就嚴謹啲。」問到Kayla被母親罰得最嚴一次，她表示：「喺中學時候，我呃佢話去跳舞，其實我嗰時已同女仔一齊，去咗搵我女朋友，佢發現我無去跳舞，打鑼搵我，我又唔聽電話，返到屋企就轟炸我，嗰陣我就啱啱買咗新電話，仲好有心機貼晒水晶閃石，花咗三個鐘去貼得好靚，我爹哋一嘢掟爛咗碎晒，好難忘呢一下，以後唔敢講大話。」
對於出櫃，Kayla都經歷了一般同性戀人遇到的5部曲，由尋找自己（self discovery）、掙扎、迷惘、接受自己，到最後完全包容自己，最重要獲得家人的包容及支持，走向彩虹的天地，Kayla笑言若然google自己時，最不想睇的新聞是當年被傳媒撞到正與女友約會尷尬，更要打電話給媽咪求救，現在回想都是人生經歷：「其實我一開始come out，係我媽咪揭穿我，當時22歲，視像緊我嘅女朋友，佢好簡單問咗句『你同邊個視像？』我就答朋友，佢就話係咩？唔似喎！開始咗呢個topic，媽咪唔係幾鍾意，有幾大拗撬，始終媽咪希望佢哋小朋友結婚、有個老公，有得自己生小朋友，呢個係好typical dream。對於coming out，父母對come out嗰個人，最重要係包容，你要包容對方，未必一下子明白，你要畀時間對方，佢都會有包容心對待。如果佢未必贊同，希望有一種愛嘅感覺，我始終都係愛你嘅人，希望活得快樂，我覺得我媽咪嗰陣時思考咗呢個位。」
現時的Kayla活得自在，近年積極參加不少平權活動，希望幫到一些人克服她曾經歷過的關口，會否多了一點使命？她笑言：「唔會講到咁大，只係希望為同志發多啲聲音，因為點解我用影相呢樣嘢，可能遲啲拍片，因為影相好講到故事出嚟，想表達到我哋故事同你哋故事都係一樣，都係想開心，都係想搵愛，所以我唔會當係一個使命，只係想感染多啲人，明白多啲我哋，亦都為我哋發多啲聲音。」
在香港，平權落後於不少國家，而台灣剛通過同婚專法，成為亞洲第一個同婚合法國家，問到她還有甚麼目標？她表示：「我希望有一日喺香港可以結到婚，我會希望可以等到香港有得結，我而家又唔係急，始終都係我屋企，如果真係當喺香港結唔到，都會想香港認同我同伴侶嘅關係。」除了想在出生的地方結婚，下一步會否與同性伴侶有自己的小朋友？她就表示：「大家都有個希望喺度。」
髮型：Jaden R
--------------------------------
【六四30】守住歷史 拒絕遺忘
https://hk.adai.ly/zdzKtt2RiW
--------------------------------
【記住63836568】全民爆相爆片！下一個爆料王就係你
https://bit.ly/2Guolu9
| (採訪：梁錦雯、攝影：沈健程、攝錄：馮嘉銘) | | |
| | | |
| | | |
| | | |
| | |
|
鍾意就快D Share啦！
|
|
|