港隊首席門將葉鴻輝上月向拍拖兩年的女友Christy求婚成功，令這名球壇筍盤宣佈「封盤」。09年奪東亞運金牌後被封為英雄輝，出道初期已規劃將來，踢波之餘不斷進修，近年更報讀教練班為退役鋪路，兩年前在深井成功上車，準備將來組織家庭。雖然球市不景，港隊熱潮也漸退，但他認為如配合天時地利，還有機會經歷另一次高潮。
師承前港隊守門員盧國華的葉鴻輝17歲出道，首季效力港甲青春班華家堡，當時月薪是5,000元，開季不久便成為球隊正選，之後隨李健和轉會老牌球會東方；為圓職業足球夢，葉鴻輝決心放下學業，希望可在足球上創一番事業。他說：「初出道月薪係5,000蚊，當年食嘢好平，茶餐都係廿幾，物價冇家陣咁高，第二季轉會東方就搵8,000蚊，嗰時18歲，覺得可以興趣當份工，家人又唔反對，但條件係要兼顧讀書，可以食屋企住屋企，呢個月薪算係咁，所以當時就訂個目標，20歲要踢球會正選，23歲前要入港隊。」這些目標，較預期早達成。
葉鴻輝於09/10球季轉會天水圍飛馬，同年助港隊在主場奪取東亞運足球金牌，在準決賽及決賽對北韓與日本的精采演出，包括在決賽互射12碼時救出兩球，成為港隊奪歷史性金牌的重要功臣，賽後獲冠「英雄輝」之名，隨後一年升格大港腳，之後一直是港隊首席門將，過去9年，合共代表香港上陣68次，還差兩場便追平李志豪代表香港70次的最高紀錄；英雄輝大港腳的代表作是2018世盃外，助港隊主客兩場賽和中國，見證另一次港足熱，過去幾季也贏過本地所有錦標，又當選足球先生，帶領東方踏足亞冠盃舞台，但這些可沒令這位球星放慢腳步，先安排時間進修學位及教練牌照，且更在2年前置業，明年與未婚妻結婚，將來路向全規劃好。
估計年薪百萬的葉鴻輝說：「近代球員退休後多數做教練，出面都有唔少足球學校，球員轉型做教練認受性係比以前高，自己暫時都會係呢個方向，始終自己熟路，亦都想培訓多啲土生土長嘅球員，等佢哋可以喺本地或代表香港踢波，呢個係將來退休後嘅長遠目標。」
問到葉鴻輝何時想到置業時，他表示置業是拍拖後的想法：「早幾年見樓市係咁升，再唔買可能就買唔到。拍拖後開始諗，將來組織家庭係需要安居，買始終好過租，供完係自己嘅，租同供價錢差唔多所以就決定買。」葉約2年多前選擇在深井置業，因喜愛該區環境較寧靜。
為在足球事業打拼，葉鴻輝選擇放棄升讀大學，但為保障自己，在東亞運後也決定重返校園，在香港專業教育學院修讀學位，過去幾季的休季期，也先後修讀亞洲足協C級及守門員教練牌照。他表示：「喺2010年重返校園，邊踢波邊讀書係應家人要求，有學位，喺呢個年代係基本嘢，之後再專注喺足球事業衝刺，有時間就讀教練班。其實讀書可以識多咗足球以外嘅嘢，好似行政、管理等，對將來一定有幫助。」
葉鴻輝說：「當年專教院嘅老師，早排建議我有時間可以再讀多個高級學位，上年就決定讀埋佢，上年我仲讀咗香港初守門員教練班，教練係日本嘅加藤浩男，佢教得好仔細，但唔係填鴨式，唔係要學生跟住做，而係要思考最好方法去解決，教法完全唔同，但之後要搞婚禮喇，可能要婚後再讀。」近年本地運動員在社會認受性確實較以往高，但職業運動員生涯比其他工種短，球員如何安排後路其實相當重要。
代表香港出賽，是不少運動員的夢，葉鴻輝2010年晉升大港腳，只是入選初期，隊友並不熱忱代表港隊。「啱啱入港隊，原來好多隊友唔想踢，因為踢成點都會俾人鬧，尤其係主場，每次比賽就會睇今場邊個俾人X。作客冇球迷，表現就肯定好啲，因為比較放。以前入選要俾人鬧，真係吃力不討好，入選有乜用？可能係同球會傾約嗰陣可叫高啲個價。」
「港足主場贏東亞運，2010年亞運又入16強，上屆世盃外又出現難得嘅熱潮，家陣代表港隊，認受性大過以前，港隊啲波好耐冇試過爆棚，不過世盃外連續4場坐爆旺角場，球員就更落力，因為唔想球迷失望；有一刻諗過，點先可以保持呢種熱度，但知道冇可能，呢兩年熱潮已經過咗。過去10年，東亞運係香港足球第一次熱潮，世盃外係另一次，不過近期就冇，香港睇運動同足球嘅唔太多，家陣要等另一個高潮，同埋天時地利人和。」葉鴻輝說。
入籍兵在近年的港隊扮演重要角色，這位前港隊隊長坦言，入籍兵並非香港足球長遠計劃，但要求本地球員達入籍兵的體格及對抗能力卻不可能：「家下香港足球環境有政府資助，但可唔可以忍受一段時間承受低迷戰績，如果得，畀後生嘅踢兩三年，7、8年後就夠料代表香港。等入籍兵幫手，就先要踢夠7季，再要等攞特區護照，前後8年，入籍兵代表得香港都過30歲，踢兩、三年都可能退，睇足總高層同教練點取捨，港隊有政府資金，亦要同球迷交代，前任港隊教練金判坤都好努力嘗試平衡本地兵同入籍兵，上一任加利韋特就明顯重用入籍兵，不過外籍教練唔知留幾耐，一定成績行先，冇得講，入籍兵嘅身體質素好過本地球員，技術就差唔多，所以自然揀入籍兵，本地後生球員喺國際賽冇咩機會，經驗同能力又唔夠，港隊揀人就要睇教練取向。」
在香港當運動員不易，還要被人利用，就更令人氣結。前年特首選舉前，當時候選人之一的林鄭月娥突然到港會場觀操，並為職球員打氣，又預祝港隊成功，當時港隊隊長葉鴻輝見這位候選人以此拉票，藉故不與她接觸。葉鴻輝坦言不明為何有人在選舉前突然現身：「點解選之前先嚟加油？喺運動員角度，自然諗到咩事，就係想拉票；個人覺得唔應該消費港隊嘅訓練時間，來話人知自己支持體育。呢個係我當時嘅諗法，運動唔係要嚟畀佢搞宣傳。」
葉鴻輝檔案
年齡：21/03/90（29歲）
身高：1米80
位置：守門員
現效力球會：東方龍獅
曾效力球會：香港09、華家堡、天水圍飛馬、南華
國際賽紀錄：68次
隊際榮譽：2009東亞運足球金牌、龍騰盃等
個人榮譽：最佳青年球員（2次）、最佳足球明星（8次）、足球先生（1次）等
記者:曾雁平
攝影:曾憲威
---------------------------
【六四30】守住歷史 拒絕遺忘
https://hk.adai.ly/zdzKtt2RiW
---------------------------
星期一至五晚上10點半
《動腦Q》Let’s Q the money！
http://bit.ly/2QW8LcI
--------------------
係你！打造星級球隊，征服各地聯賽！立即加入『BFB CHAMPIONS 2.0』！
http://bit.ly/2BUtLvW
--------------------
《體蘋果》陪你睇波講波
https://www.fb.com/appledailysports
|
鍾意就快D Share啦！
|
|
|