一台獨大，藝員講到跟無綫簽約，相信個個都有苦自己知，不過無綫苛刻，已經不是近日發生。日前羅家英在節目中大爆資深藝人劉兆銘，多年前跟無綫續約，無端端被變成每年只做一個騷。劉兆銘前日受訪時無奈說：「我覺得TVB對我嚟講，我開台到家吓仲有啲感情，呢個係自己儍之嘛，以為自己有啲感情，係有呀，個感情就係點解人哋咁冇感情！」
撰文：魯吉
相關新聞：【法國習舞】能舞能演能教
劉兆銘60年代無綫開台時，為綜藝節目如《歡樂今宵》等編舞，其後拍攝劇集，經典角色包括《千王群英會》的仇大千、《新紮師兄》演梁朝偉的老竇等，但到期與無綫續約，便被難為。羅家英日前在ViuTV節目中，講起無綫不尊重老一輩藝人，指現年87歲的劉兆銘曾不受尊重，羅家英說：「一年一騷呢個問題，我聽劉兆銘講嘅。佢之前同TVB簽約，簽完一出門口，嗌佢返轉頭話：『劉生，你已經超過60歲，呢份約我哋要取消，要簽過另一份。』另一份合約，列明一年一個騷，咁劉兆銘話唔簽，要走喇。後來佢喺澳門同我拍緊一套戲，佢拍晒枱好嬲。」
| | |
「聽上嚟好為藝人」
前日劉兆銘向《蘋果》親述拍枱事件，他在訪問中笑說：「係呀，好耐世紀喇。我係第一個藝人簽一個騷，個道理好好嘅，你簽一個騷好自由，你可以做又可以唔做。佢又唔使養你，你又冇酬勞得到嚟保障你嘅生活，公司鍾意畀你做，唔鍾意就唔畀你做。聽起上嚟好為啲藝人喎，我早期冇經驗唔知好唔好。」
問到羅家英指他拒絕簽約，劉兆銘說：「嗰時好多嘢我唔記得，我記得就話，佢既然咁對我，覺得唔重要，如果重要梗係要我簽多啲，我又冇哀求佢，我又唔係佢培養出嚟嘅藝人，開始係我喺訓練班教演員嗰個角色之嘛。」那有否嬲到拍枱？他說：「咁梗係會啦，估唔到搵食咁艱難，話畀自由，原來係僱主冇乜責任去理啲工人咁樣，你唔係藝人，你係搬運嘅或者做雜工。」
| 《千王群英會》一劇，劉兆銘演的仇大千一頭白髮造型令人深刻。劇照 | 劉兆銘在《新紮師兄》中，扮演偉仔的衰老竇（右）。劇照 | 電影生涯上，劉兆銘在《倩女幽魂》系列的「姥姥」深入民心。《倩女幽魂III道道道》劇照 |
劉兆銘指自己仍是無綫藝人，但網上指他今年1月約滿後沒有再續約，他說：「呢啲消息我都唔知，咁公司年年都可以咁樣，譬如噚日滿約，我啱啱唔知去咗邊度地方，我話『返嚟先簽啦』，咁佢就隔咗一個星期或者一個月先簽囉，唔在乎我存唔存在㗎。如果有間公司咁樣請人，你話幾好呢。唔去得第二度做嘢，係屬於佢嘅，佢又唔使畀嘢你做，又唔使畀錢你，佢大晒㗎嘛。我覺得由TVB開台加入，仲有啲感情，呢個係自己儍之嘛，賣都賣咗盤啦，都人面全非啦，以為自己有啲感情，係有呀，個感情就係點解人哋咁冇感情！」
「有個number係我」
那是否仍是無綫藝人？劉兆銘說：「咁咪等緊佢簽囉，簽咪有約，唔簽咪冇約囉。公司唔識我吖嘛，公司見到有個number係我之嘛，唔係一個藝人，唔係劉兆銘吖嘛，係觀眾先當我係演員。」
|
鍾意就快D Share啦！
|
|
|
