現年52歲嘅周海媚，傳過有多段戀情，包括有呂良偉、黎明、游泳教練兼演員林偉亮、日本藝人永瀨正敏、迪生集團執行董事伍士榮、內地演員陳龍、李貴府等，不過，由她口中承認的，只有呂良偉及比她細7年的內地建築師男友。03年，周海媚同細過自己嘅內地建築師男友一見鍾情，一拍就拍咗12年拖，最後，因女方冇結婚打算，戀情於15年結束。到今時今日，周海媚仍然相信愛情嗎？她說：「相信，我仍然相信愛情。」過往幾段愛情，最深刻係邊一段？「最深刻係之前曾經同一位中法混血兒拍拖，佢有一半係法國人，一半係中國人，但係我覺得佢偏向法國人比較多，所以好浪漫，同埋會好尊重你，好尊重對方，兩個人相處時覺得好舒服。」同已經分手嘅男朋友，仲可以做朋友嗎？「大部分都可以做朋友嘅。」同建築男友分手後，到而家有冇拍拖？「我已經無拍拖好耐。」
凍齡秘技
今年已經52歲，喺呢個年紀要搵男朋友難唔難？有冇咩擇偶條件？周海媚答：「我覺得無難度，只不過係我唔去搵啫。其實我無咩特別要求，好簡單，最緊要係心地善良、勤力，同埋喜歡小動物。」而家咁嘅年紀，會唔會特別鍾意小鮮肉？「其實坊間真係有好多傳聞，話我同呢個小鮮肉拍拖，同嗰個小鮮肉拍拖，其實真係無呢啲咁嘅事，只不過係一齊飲個下午茶啫，啲狗仔隊就會攞嚟炒作，我覺得都無辦法，所以其實係無啲咁嘅事，大家唔需要相信。」周海媚keep得好好，呢個「凍齡秘技」，可唔可以傳授一下呢？「我覺得係心理上，心情好緊要，即係唔好樣樣事都愁眉苦臉，有咩事都覺得好介懷，其實我係一個好容易開心嘅人，我嘅性格都係比較開朗，因為本身屬馬，係射手座，所以亦都係好鍾意向前看，唔鍾意凡事回頭看，懷念以往點滴，我唔會咁樣囉，我覺得做人係要向前看、向前走。」
因為一場雪而愛上北京
周海媚係好早期已經北上發展嘅藝人，不經不覺，原來佢已經移居北京16年！唔知佢有冇掛住香港呢？她說：「啱啱搬去北京嘅時候，都會好懷念香港嘅茶餐廳、食物等，因為我好為食，同埋燒味飯。後來慢慢喺北京開始有呢啲茶餐廳出現，而且味道同香港都愈嚟愈接近，非常好食，所以都OK。」點解03年已經有移居北京嘅決定？「其實我係02年去北京拍一套電視劇《其實你不懂我的心》，當時落咗一場好大嘅雪，然後我覺得好靚，北京落雪嘅時候好靚，尤其喺故宮，或者行喺街上面都好靚，我好鍾意冬天，所以後來就鍾意咗呢個城市，決定嚟北京發展。」當初人生路不熟，喺北京生活，有冇遇到咩難題？「分辨唔到方向，好多時候認唔到路，唔知道喺邊，然後要問路，啲人會話前面五百米往北走，前面二百米往南走，咁就死啦，南邊喺邊？五百米有幾遠呢？我都唔識，都係分辨唔到，所以最初經常走錯路。」離鄉生活，對一個女仔嚟講感覺點樣？「其實對我無咩難度，亦無咩困難，我其實最初入行已經周圍去不同地方、不同國家去拍戲，所以其實對我嚟講無咩難度，我覺得OK。」
試過斷手腳又被斬腫
由演周芷若到演滅絕師太，接拍時心理上唔知周海媚需要去調整嗎？她認真地說：「其實都無咩特別需要調查，我覺得坊間觀眾朋友嘅反應，比我自己更要大啲。其實我覺得好順其自然，因為二十幾年前我係演周芷若，亦都係適合我去演呢個角色。但係今時今日都已經五十幾歲，我覺得自己亦都適合演滅絕師太呢個角色，我覺得係好合適。」有沒有猶疑過不接拍呢？「有呀，但我猶疑嘅原因，並唔係因為我喺同一套戲演出不同嘅角色，而係因為咁多年以嚟，我拍咗好多武俠劇，同埋要做好多打鬥動作，期間受過好多傷，手曾經斷過，腳被斬到腫咗，腰椎亦都受傷過，因為經常吊威也，所以當蔣家駿導演搵我嘅時候，我係拒絕咗嘅，因為我覺得自己有好多動作都做唔到，驚會打得唔好，或者躭誤拍攝，所以最初係拒絕嘅。」兩個角色最大嘅分別是哪裡？她說：「最大嘅分別，就係一個係周芷若，一個係滅絕師太，我覺得唔可以混為一談，只不過係兩個角色我都演過，但係並唔代表可以去評論角色，因為周芷若就係周芷若，滅絕師太就係滅絕師太，根本係演唔同嘅人，所以無理由將佢哋夾埋一齊講。」
來源 source: http://nextplus.nextmedia.com
|
鍾意就快D Share啦！
|
|
|
