崔嘉寶於23歲時，就由路人甲升呢做女主角，拍住當時得令的廖偉雄演《黃土恩情》。以為星運從此亨通？卻原來是個幻想。劇集一落幕，崔嘉寶即打回原形，繼續做舞女A，她坦言大受打擊：「匿喺屋企喊過，唔係委屈，係失望！」不服輸的她繼續努力，終於再由十線爬升回二線，直至她息影結婚。
採訪：戴彩煥
攝影：沈健程
相關新聞：港姐朋友做媒介紹老公
現年51歲的崔嘉寶自1995年拍畢《情濃大地》後，息影結婚，為晨曦足球隊班主之一的周文曦生下三子女。過去24年來，崔嘉寶一直做幸福人妻，今年3月卻忽然重出江湖，為好友鍾淑慧大馬慈善騷擔任嘉賓，莫非有意復出？崔嘉寶日前接受《蘋果》專訪，她坦言：「我啲仔女好想我出嚟做番，但我唔知可以做乜，有人搵先算，有機緣咪做囉，旨在過癮。」
| 崔嘉寶執二攤拍《黃土恩情》首度擔正，她很感激廖偉雄當時的照顧。電視圖片 | 崔嘉寶（右二）與羅家良及周海媚（左）拍畢《情濃大地》後息影。電視圖片 |
最鍾意演奸角
崔嘉寶1986年參選香港小姐入行，早年經常被派演舞女和反叛少女，由「姣斯燉篤」情婦，到變態殺人魔，做盡天下壞女人角色：「訓練班出嚟梗係俾人book做甲乙丙丁ABCD，可能我個樣有性格啲，唔會點搵我做啲好嘢，通常曳啲，舞女啦，高級啲咪做情婦囉。做得幾好咪二奶囉，總之係一級級上，但都係衰人、變態角色，總之唔衰唔做，但其實我鍾意做奸角，發揮大好多。」
1991年播出的《黃土恩情》是崔嘉寶唯一一次做女主角：「廖偉雄、邵仲衡做男主角，原本黎美嫻係女主角，佢拍拍吓爆親塊面，但開咗劇唔停得，李添勝搵咗我頂上。」她直言感到非常驚喜：「當時我仲係好N線配角，但突然孭正，叫聽日返工，我係冇準備忽然間上馬，但都學到好多嘢，阿燦哥（廖偉雄）都好照顧我。」
相關新聞：跑步開心過買嘢
崔嘉寶擔正後，卻突然變回路人甲乙丙，她坦言當時感到非常沮喪：「最初出嚟做甲乙丙係OK，慢慢嚟做仲好。但忽然間上過一線喎，冇一線都二線，冇二線都三線喇，點知跌番落十線，嗰個感覺係辛苦。」由山頂被推落山谷，崔嘉寶因而大受打擊：「我有匿喺屋企喊過，唔係委屈，係失望！以為自己上位，但原來要由頭嚟過，我唔忿氣，我表現唔好咩？有啲唔服輸心態，我係都要爬番上去。」
後來崔嘉寶再遇燦哥，對方給予她極大鼓勵：「我係後面妹仔嗰啲角色，有場戲係take我哋四個女仔好驚嘅樣，冇角色但大頭，我就諗一個唔係咁正常驚嘅反應，我真係有用心諗過。拍完之後，燦哥走埋嚟拍一拍我膊頭話『𡃁妹你繼續努力啦。』佢睇住我由主角褪返落去，一個大頭都諗方法爭取自己表現。呢個鼓舞我到𠵱家都記得，我唔想衰俾人睇，我要話畀佢哋聽，我真係好鍾意做戲，我係得嘅。」
乖乖女唔推戲
為一步一步爬上位，崔嘉寶從不推戲，那管是《魔刀俠情》要她飾演跟自己年紀差不多的蔡少芬和洪欣的親生母親：「佢哋兩個都高頭大馬，我嗰時25歲，佢哋20歲左右。我都有𢱑爆頭，真係諗唔到……成件事都幾『夾硬』，但我宗旨係畀得我做咪做，我唔怕做。」監製眼中，崔嘉寶是個乖乖女，不推戲，不遲到早退，所以合作過的監製們再開新劇也愛找她演出：「我就咁一套一套咁爬番上嚟。」結果，崔嘉寶由十線慢慢再升上二線角色。
離開娛樂圈24年可曾技癢？崔嘉寶說：「最初幾年有，其實一開始冇做係開心，終可以瞓到自然醒，以前長期唔夠瞓，每日瞓兩、三個鐘，最長三日冇瞓過，真係癲癲地。」
|
鍾意就快D Share啦！
|
|
|
