許多港人習慣將重要的物品放在保險箱，以為這樣比較安全，不過你會否想到忽然有一日去到銀行門口，整家銀行不見了，連保險箱都被搬走！
翁靜晶今日在facebook留言怒斥前址位於大埔廣場的一間銀行，留言：「竟然發現成間銀行唔見咗！保險箱的東西及保險箱，去哪裏了？是不是需要報警？完全沒有收過任何通知，剛知道這間銀行已於2017年搬走。終於聯絡到銀行，保險箱被遷移去另外一個銀行地址，原本是爆滿嘅保險箱，而家只係八成滿。入面嘅東西，似乎是少了，至少有兩件首飾搵唔到。職員告訴我，搬運的時候，只有銀行職員在場，沒有律師或公證行監察。」
網民問她為何兩年沒去銀行，翁靜晶解釋：「平時唔戴首飾就唔會去啦，確認佢哋只係寄過一封平郵嘅信件，提醒如有易碎物品，應該移除，法律責任方面，這應該是寄掛號，盡一切能力確保客戶得知，銀行明顯疏忽。搬之前冇用掛號郵件通知，搬完亦無通知！收費就一定通知！」
翁靜晶今日接受《蘋果》訪問：「頭先同大埔銀行經理傾咗，牽涉到約1千個保險箱客戶，如果封信冇退番嚟，佢哋會就咁搬你個箱，如果平郵退番嚟，佢哋就會打電話通知箱主，咁我覺得咁做好唔合理，人哋畀幾千蚊一年，喺保險箱擺住啲嘢，呢啲一定係好重要嘅嘢，好有紀念價值嘅嘢，你應該每一封信，加多幾蚊寄掛號，就算1千個客戶，當每一個人多10蚊，相比於人哋物品嘅價值，你使多嗰10蚊算得係啲咩，銀行完全冇衡量過輕重。」
她又指銀行沒盡能力去聯絡客戶：「好似你有一間屋，你唔會諗到有人會將佢箝走，入面可能有啲嘢冇包好，易破碎嘅玻璃、或者翡翠，你將佢就咁搬，由第一個地點搬去另一地點，路程都好長，打爛咗啲嘢點計，起碼畀個機會人哋去處理一下先搬，佢哋呢個做法好唔啱，直情搬咗一年半都冇再通知，封信冇打回頭就當寄到，呢個講法都唔合理囉！」
講到為何兩年沒去銀行保險箱查看，她解釋：「因為個箱都滿晒，啲嘢又擺唔落，所以呢幾年都冇去，今次去到睇個箱只係得8成滿，點解個箱望落去少咗嘢，係唔係喺搬運過程郁動過、戥實咗，定係其他原因，目前為止，我只係知有兩件好重要嘅物品搵唔到，有影低啲財物，不過你冇辦法證明之前啲財物係唔係喺入面，多數保險箱都係擺私人嘢，你唔會同銀行講入面有啲咩，我都諗緊法律行動上，可以點樣向佢哋追討，要睇番開戶時，有冇啲咩免責條件，如果人為嘅，銀行走去搬嘢，又唔同人講，呢啲要研究番法律層面，就算你有買保險，但個箱喺冇畀人開過嘅情況下，保險都係唔賠，希望啲嘢冇唔見，個心係好唔舒服，因為個箱本來係滿，而家得8成滿，你又唔記得有咩喺裡面，或者仲多過兩樣嘢唔見咗，又可以點去證明呢！證明到又點去追討，呢啲要逐一考慮。」
翁靜晶稱要等明日才能確認是否有財物損失：「客戶服務處等咗好耐先接通，搞得嚟都四點幾鐘，我嚟唔切去中環公司睇吓，今晚要擔驚受怕，等第二日睇吓其他地方會唔會搵到，如果我再大年紀啲，去到睇到銀行唔見咗，可能頂唔順，打激好大，銀行此事責無旁貸。」
翁靜晶又指銀行搬運保險箱未有找律師或獨立第三公證人查看搬運過程，只是銀行職員監督，確保保險箱在搬運中未被打開過，她說：「有冇錄影整個過程，如果好哋哋就話，又如果唔見咗嘢，你又點去證明，令到客戶安心，我唔見咗嘢，一定會覺得係人哋攞咗，要顧及客人感受，這個是大型搬遷行動，當中牽涉1千人嘅重要物品，最低限度都要有一個服眾的措施，如果咁多人冇反應，冇返嚟攞嘢，你係唔係要更加注意呢，我覺得佢哋做得唔好、非常差。」
正常情況下，銀行分行搬遷均會通知保險箱客戶，先領回保險箱內物件。東亞銀行（023）發言人回應稱，該行就保管箱的搬遷有既定的處理程序，亦會在保管箱搬遷前透過信函及分行通告預先通知受影響客戶，以便他們作出安排。
根據該行紀錄，翁小姐個案所涉及的保管箱是整楝由大埔廣場分行搬遷至同區的大埔分行，過程並不涉及開啟保管箱，搬遷程序按照業界的保管箱最佳操作建議執行。該行會與翁小姐保持溝通，以作跟進。
-----------------------------
新聞有價 你肯為《蘋果動新聞》付幾多錢?
https://hk.adai.ly/QDTT6y5mgX
--------------------------------
【記住63836568】全民爆相爆片！下一個爆料王就係你
https://bit.ly/2Guolu9
| 翁靜晶今日在FB聲稱失首飾，怒斥銀行明顯疏忽。（右圖翁靜晶提供圖片） | | |
|
鍾意就快D Share啦！
|
|
|