元華細細個同成龍、洪金寶、元秋係七小福成員，一班人柴娃娃打到大，各人分別打出名堂，雖然元華嘅名氣唔夠成龍、洪金寶勁，但係，佢嘅成就都唔差，做過李小龍替身，拍過唔少電影嘅佢，仲拎過金像獎「最佳男配角」。96年加入無綫拍劇嘅佢，拍過唔少劇集，直到12年，佢離開咗無綫。
蓋：係你唔簽定係佢唔簽？
華：係我唔簽，因為外邊有工作，而且報酬比較高，當然係跳出去啦。
蓋：反正都覺得拍劇已經玩夠？
華：係呀，都算係玩過，所以又去番拍戲。
蓋：有傳係你好嬲所以唔續約？
華：都唔係嘅。
蓋：有冇開出續約offer？
華：我記得最後一套劇係《法證先鋒》，完成之後就無再簽約。合約到期，我無搵佢，佢哋亦都無搵我，就係咁樣不了了之。
蓋：會唔會好心淡？
華：好心淡？又無嘅，都應份嘅，攞得人錢就要替人工作，無咩話心淡。唔係話做咗嘢但係無俾錢，佢一樣有出糧俾
你嘛，大家無話係你靠我，或者我靠你，最後係不了了之。
蓋：到而家有冇搵你返去？
華：有搵過我一次，當時我喺出面拍緊戲，所以無再傾落去。
蓋：只係簽一騷嘅情況，就係因為電視台唔係好需要你？
華：無錯。得番一間電視台，你可以去邊？好現實，太殘忍，如果好似內地咁樣，多十幾廿個電視台，會爭住用人，因為多競爭。香港就來來去去都只係得一個，無咩競爭，所以只會同你簽一個騷，反正大把人選擇。
蓋：但有啲甘草演員又肯簽？
華：係呀，因為要食飯嘛。如果你底子厚嘅話，當然唔會簽啦，有啲底子唔夠厚嘅，就當然要簽啦，因為都要食飯，要生活嘛。
蓋：你底子厚唔厚？
華：薄薄哋，又唔算厚啦。
蓋：如果得一個騷，你簽唔簽？
華：而家底子比較厚，唔使簽啦，俾啲底子比較薄嘅去做啦，我仲要同人去爭咩？唔好喇。
12年離開無綫後，華哥過檔港視，可惜當時開台唔成，所以，佢之後都係客串吓電影拍攝，斷斷續續返內地拍劇，近年，已經半退休。
蓋：有冇打算退休？
華：而家咪退緊休囉。
蓋：但係你仲有工作在身，就唔算退休啦。
華：我係退而不休，即係會選擇性工。作，唔係所有工作都會做，會選擇工作。
蓋：有足夠生活費，就可以選擇工作
華：夠用就算啦，唔需要咁搏。
蓋：係唔想再搏，定係應付唔到？
華：我試過一次，做嘅時候發覺唔對路，有心無力，以為自己仲得，但其實已經唔得，個頭爭啲插落地。以為自己仲好似以前咁樣，但其實已經走緊下坡，自己都唔知道，好容易就會出事。試過有一次，成塊面喺地面擦咗一下，好彩當時係草地，所以無咁傷。
68歲嘅華哥，最近做咗爺爺有孫女抱，真係恭喜晒！
蓋：仔女近況如何？
華：個仔喺加拿大做銀行工作，個女喺香港教書。
蓋：已經抱孫？
華：係呀，五個月大。
蓋：而家住喺加拿大？你咪要飛過去至可以見到佢？
華：係呀，要飛過去見佢。
蓋：一直期待住抱孫，定係隨緣？
華：見到都已經開心。
蓋：將來仲有咩嘢目標？
華：目標就係健康，保養好身體，唔好再頹落去，就算退咗休都要繼續做運動，經常會圍住科大行一個鐘，行上山，然後返屋企沖涼、食飯，倒豎葱一分鐘，然後再試吓兩分鐘，一路加上去。
蓋：現階段嘅華哥都會以身體健康、家庭為先？
華：無錯，身體、家庭，然後工作排第三，虛榮嘢就擺埋一邊先，有適合嘅工作就做，有啲覺得唔適合嘅就唔會做。
蓋世寶化妝：毛毛（嫁妝）
策劃：肥A
攝錄：黃志明、李玄
|
鍾意就快D Share啦！
|
|
|