近日有傳政府一旦踢走鄭若驊，湯家驊(圖)或會接任律政司司長一職。
因「放生黎智英，唔告梁振英」而捱轟嘅律政司司長鄭若驊民望長期低迷「墊司底」，今次政府修訂《逃犯條例》，佢亦未有做好解說工作，成為「避政司司長」，撤換鄭嘅聲音不絕。近日有傳政府一旦踢走鄭，曾為公民黨(公文袋)成員，之後轉軚成為建制一員嘅行政會議成員湯家驊或會接任律政司司長一職，如果係真嘅話，政府呢鋪真係捉老鼠入米缸喇。
湯家驊嘅臭史真係一匹布咁長，而佢同鄭若驊嘅共通點就係都曾被揭發過寓所涉僭建。2011年佢仲係公文袋立法會議員時，就被踢爆其位於大埔康樂園嘅豪宅單位涉嫌僭建玻璃屋。佢當時一度引用自己有份打過嘅一單僭建官司，死撐話玻璃屋屬豁免規管類別，之後其他法律界人士及屋宇署就指證出錯，佢先話自己一時記錯案例，向公眾致歉及承諾清拆僭建物，真係𤓓到爆。
2015年湯家驊喺立法會未能通過政改方案之後，就退出公文袋並辭任埋立法會議員，之後成立行中間路線嘅民主思路，由泛民一員變成被泛民唾棄嘅一員。至前年現屆政府上場，佢就被委任為行會成員，成為建制一分子，話湯係政界變色龍亦不為過。
湯家驊亦都可以話貫徹兩頭擺嘅作風，近日政府修例就係其中一個例子，過去一直撐政府修例嘅佢，喺上月市民包圍立法會後就改晒口風，話政府可考慮所有方案，包括唔即時去通過呢條條例，其後政府就「跪低」宣布暫緩修例喇。如果政府真係委任佢接替鄭出任律政司司長，真係隨時自己攞嚟衰喇。
來源 source: http://hk.on.cc
|
鍾意就快D Share啦！
|
|
|
