「如果沙士有買樓就發達啦!」這句飄流網絡世界多年的葡萄友心聲，在現實世界大有人在。由打工仔變老闆的趙生，不單止沙士買樓賺人生第一桶金，還在08年海嘯後買樓賺多次，16年來由單身漢變多仔公，2房竇口變4房豪宅，自言不是樓市專家。
趙太說，一路走來純粹抱住買樓自住的需要，「一諗住炒樓就危險」，食正樓市狂升浪潮，今天換樓換到近2,300萬長實荃灣海之戀‧愛炫美4房海景單位，感恩地說：「上天眷顧。」
趙生說人生買的第一層樓是長實大角嘴凱帆軒，「當時2003年年尾，樓市跌到最低位咁滯」，都驚低處未算處，但打算結婚，計劃2004年入伙就決定買。「當時樓市好靜，售樓處無人，個個戴口罩。其實2003年尾市況好返啲，但樓市已跌到好慘。」趙太補充：「唔係專登揀嗰嗰時間，咁啱需要嘅，當時有銀行朋友話唔適合買住，我哋諗住自住就無所謂囉。」
當年凱帆軒實用呎價5,000多元，部份實用429方呎的兩房單位成交價更不用200萬元，趙生最終以約194萬元買入一個實用450方呎的兩房單位，「當時按揭可以借9成半，銀行借7成，發展商借2成半，無壓測，買樓好簡單，銀行同發展商借晒畀你，首期5%即約10萬元。」他記得當時和趙太月入共逾2萬元。
「當時二按是簽約2年後先供第1期，未開始供二按，已經賣咗層樓。因為自己想出來做生意，層樓賺咗百零萬，筆數都好犀利，算係第一桶金。如果而家睇返，真係用好彩來形容，而家無得擁有呢啲機會，你唔會話拎10萬元出來買樓，然後砰一聲升到百幾萬。」
賣掉凱帆軒，趙生帶老婆跟父母住，趙太說賣樓捨不得，但老公決定創業要「盲撐」。趙生坦言，做生意好似買大細，咁當時一定好有信心，太太工作穩定成為他的後盾。身旁趙太補充：「最緊要自己需要，樓市升又好跌又好，總之自己住，供得起，咁就無問題。」
2008年金融海嘯後，趙生經營的生意算不俗，抽資金入市買樓，以約200萬元買入葵涌浩景臺一個2房單位，「始終係香港有嚿磚頭會安心啲」。換言之，趙生在03年及08年兩大低位入市，「因為唔係低位，根本拎唔到錢出來。如果而家高位，我去開始，開始唔到啲咩，啱唔啱先。始終睇餸食飯，一定低位先入到市，如果唔係，我唔夠資金。件事係好smooth，唔會突然其中一位起身，然後話買樓囉。大家都知道唔係咁，係一路睇住盤數，盤數去決定。」
隨住仔女陸續出世，2房換3房，3房換4房，由浩景臺換荃灣汀九翠景臺，2012年換荃灣昇柏山，都是長實樓，但趙氏一家沒住過，因為屋企人口眾多，且為方便返工，就租住土瓜灣翔龍灣4房單位，昇柏山就放租盡量套戥。兩年前，趙太稱：「我哋想住返屬於自己嘅屋，可以自己佈置。租樓你唔捨得花錢落去，好似幫人裝修。」以前住過翠景臺，見識過荃灣西海景，就去入飛抽荃灣海之戀‧愛炫美，可惜抽不到，但趙生死心不息，他索性walk-in入售樓處買貨尾，「當時賣咗一大浸後，得返幾個單位，我自己行入售樓處，自己篤㗎。係貴啲，但唔係差好遠，無辦法，抽唔到。當然原本諗住越平越好，但我唔介意賣剩，你買到時候，你唔會介意，始終心儀屋苑，交通方便，已經值回票價，呢度無乜特別挑剔嘅地方。」
最終他以近2,300萬元買入一個實用1,162方呎的4房單位，笑言自己是「長實粉絲」，事關買過3層新樓都出自長實，「始終其他樓盤呎價貴啲，見到都知道唔夠實力買」，他利申：「我無同長實有任何生意往來，無幫佢賣廣告㗎。」
冷氣機喉吊吊揈 明哥懷疑吊船撞甩
資深驗樓師賴達明驗收趙生單位，客廳地腳線多處鬆脫令修口裂開、油漆多處沙眼、不平滑及難以解決的收水裂紋。轉入客廁打開浴室櫃板，沙石未清猶自可，滿佈蜘蛛網就難收貨，始終是全部樓盤。推吓全屋幾度門，就連業主都覺得閂門不暢順。明哥認為，裝門手工問題，見到門鎖脷去不到鎖窿，每每須用力推多一下才能閂門。
最大問題是主人房套廁發現，所漏之水就不是企缸洗手盆等喉管。推開氣窗，驚現一條由單位伸出來白色喉管吊吊揈，且有水滴出，相信駁入主喉較位甩掉。明哥伸手觸摸，說水是涼，從喉管走出位置及水溫而言，理應是單位冷氣機去水喉。明哥相信，不排除工人坐吊船進行外牆維修時撞甩條喉。總結，單位來去水、門及浴室用具扣分最多，不過由於單位面積大，總分仍獲82分。
長實發言人回應，上述單位已收到樓宇接收核對表格，除玻璃項目需等候物料運抵才可更換外，其餘項目承建商已全部執修完工。
記者：陳家雄
影片：
採訪：陳家雄、張嘉鎣
編撰、旁白：張嘉鎣
攝影：梁煒傑
剪接、後期：Su
編審：楊智佳
|
鍾意就快D Share啦！
|
|
|