苗僑偉讀藝員訓練班入行，80年代他與劉德華、梁朝偉、湯鎮業和黃日華被封為「無綫五虎將」，之後各有發展，但多年來合作，他們建立了友好關係。近日苗僑偉與劉德華在電影再度合作，早前三哥為電影宣傳接受訪問，表示老友十幾年沒有合作，今次重聚，大家聚埋一起會「話當年」：「我哋好多嘢講，由40年前開始講起，好長嘅，由廣播道五台山年代吹到而家，主要數緊佢同我都做訓練班，大家讀完出嚟，做過乜嘢，跑龍套做茄哩啡時嗰啲趣事最多，跟住又會傾下星光熠熠時候，我哋嗰陣畀人叫五虎，（喺節目）玩雜耍，其實喺專業玩雜技、雜耍嘅人面前我哋係小毛見大毛、蚊型，以前打吓筋斗，以為好似好勁，跳吓彈床，當時我哋新來後生仔玩呢啲好得意，電視台出了五個0靚仔，畀人講咗係五虎，其實五虎係傳媒畀既。」
識於微時，三哥指每個新人入行都有辛酸的時候，大家一直累積經驗，這是必需經過的時候，是一個必經的階段，新人都會遇到，他指大家以前到片場都一定會遇過好驚慌、慌失失的時候，但他與華仔聚在一起時最多的笑料，反而是他們一起到外地登台的日子：「我同華仔最多笑話就係登台，以前都好多時候一齊去登台，去美國、東南亞等地方，我同佢去登台，唱歌時我會唱錯晒歌詞，都未到（嗰個位）我就唱咗去後面，搞到佢無所適從，好多呢啲趣事。」
除了梁朝偉外，其餘四虎都會經常見面，至少每年見一次，三哥表示很珍惜這些日子，他說：「除咗偉仔少見啲，我哋幾個每年至少會有一餐團年飯食下，過年之前點都會抽個時間大家睇下喺唔喺香港，出嚟食餐飯聚一聚見個面，傾下屋企嘢。」難得見面大家都不會涉及工作或利益，幾個大男人從來都不會鬧交：「搵唔到乜嘢理由要鬧交，我哋平時各有各忙好少見，所以喺埋一齊時就食飯，大家寒暄吓互相問候，點會去到鬧交，冇可能去到呢個題目。」
華仔兩年前外地拍廣告受傷，朋友間都大為緊張，三哥回想當時一班老友也很緊張，向來工作也瞓身做的華仔終於會「錫身」，他說：「好擔心架！佢未返嚟醫時睇到新聞已經好擔心，返到來第一時間去醫院睇佢。你而家唔叫，佢都識得要保重，佢今次受過傷之後都係小心咗，唔單止自己，連其他演員做一啲動作，佢都會關心安全設施。」
今次拍《掃毒2天地對決》，三哥與老友相逢外，他與古天樂亦有很多對手戲，二人其實一早認識。當年三哥仍有經營眼鏡生意時，曾找古仔做其中一個品牌眼鏡的代言人，今次在戲中才首次跟古仔合作，三哥謂古仔臨場時有很多即興想法，令角色更立體生動：「古仔會有自己嘢加落去，有場我要保護佢去慈善機構，本來佢要拎定一元出來捐錢，我嘅伙記話你使唔使咁寸，佢就加咗話嫌少呀？原來佢一早安排手下袋多一毫子，嫌少就大多一毫子，一元之餘多一毫子仲叫人開單，呢啲佢喺現場諗，佢有好多呢啲即興嘢，盡量將戲劇帶一啲幽默，令觀眾覺得佢衰之餘又幾幽默，觀眾睇落會有啲輕鬆，令個角色更深刻。」三哥謙稱今次跟兩位影帝合作獲益良多，可以從中偷師。
以往在劇集中見到的苗僑偉，經常都在古裝劇中扮演風流倜儻的大俠，楚留香便令人留下深刻的印象，不過演時裝劇的時候，《學警雄心》、《學警出更》、《刑警》等等，很多時候做一名警察：「我唔介意做差人角色，導演覺得我做差人似就冇所謂，每個故仔差人都好多種性格，有唔同嘅背景，劇本畀你係咩樣嘅警察就做乜，導演想我做警察我就唔介意。當然收到劇本第一句一定都係話『又係警察』，我將會有其他劇本都係做警察嘅，舊年喺日本拍咗一套戲，又係做警察，做日本刑警，做咗好多警察，但今次遭遇都唔同。」
作為演員，三哥安守本份，只要劇本適合，角色討好，他便不會介意接拍，而他沒有多想過要做什麼角色，他說：「冇諗咁多，導演想我做乜就做，試下唔同角色梗係想，但都要睇出品商、導演覺得我適唔適合。我都有做其他嘅角色，好似早排重播嘅《好心作怪》，個角色都幾得意。」
採訪：王連連
場地提供：香港九龍貝爾特酒店
------------------------------
【每周送10萬】
升級壹會員獨家尊享，立即參加10萬火急大抽獎!
*推廣生意的競賽牌照號碼：52302-9
| 攝影：陳慧安、攝錄：廖達燊 | | |
| | | |
|
鍾意就快D Share啦！
|
|
|