倪匡創作的《衛斯理》系列，至今仍膾炙人口，是中文科幻小說經典之作，《衛斯理》以第一人稱書寫，讀者代入感大，倪匡笑說：「我寫嗰啲嘢太怪誕喇，第一人稱畀人有現實感，到𠵱家仲有儍仔嚟問我真定假，小說梗係假㗎」衛斯理沒有任何正職，不時有人好奇他到底是靠甚麼維生，倪匡笑言：「自然有人畀錢佢，又識得有錢佬多，哈哈！郭靖、黃蓉靠乜嘢搵食？呢啲根本係屬於武俠小說嘅範疇。冇一樣嘢係合理嘅，冇一樣嘢係現實嘅，因為全部都係幻想，衛斯理根本係一個武俠小說人物嚟㗎嘛。」
衛斯理最後與白素隱居，亦舒在《朝花夕拾》交代衛氏移居到了月球寧靜海，倪匡笑說：「我都唔知去咗邊，月球有乜嘢好住呀？咁荒涼，應該係去咗一個好美麗嘅外星。」不過，衛斯理卻是倪匡最不喜歡的角色：「諸事八卦，唔關你事嘅你都去查，而且查咗毀滅證據，死無對證。」倪匡另一作品的角色原振俠與衛斯理是好友，卻未試過一同冒險，倪匡笑言：「好唔容易想到隻故事，梗係分開嚟用啦，拍埋一齊咁嘥，哈哈！我靠寫稿搵食㗎嘛！」
相關新聞：林鄭傀儡好可憐
堅信有外星人
雖然小說天馬行空，但倪匡真心相信有外星人︰「嗰陣買咗寶馬山賽西湖1600呎連天台單位，得閒無事就上天棚坐喺度等，睇吓有冇飛碟經過。星球太多喇，我哋想像嘅所有生命都係有頭有腳會郁嘅會呼吸會食嘢，你外星人嘅生命可以係唔同嘅形態，可以係唔郁，可能完全冇頭。」
倪匡曾在成人雜誌《老爺車》刊載小說，情節奇特之餘帶點香艷，他笑說沒有寫過全鹹濕小說：「你哋太後生喇！我啲鹹濕小說係𠵱家50、60歲嗰啲人，喺15、16歲時當係性學啟蒙㗎，個個睇到嘩嘩聲。總共寫咗11本，俾法庭告咗六次。告我太鹹濕。我一本收佢1,000蚊稿費，俾法庭告一告罰咗6,000蚊，唔好意思寫落去。」
|
鍾意就快D Share啦！
|
|
|