46歲的葉蘊儀（Gloria），今年勁減36磅拍半裸寫真，一洗《女人俱樂部》內的「肥菜」形象。從一代玉女變師奶，再從師奶變回美魔女，正如她的過山車人生。當年22歲在最紅的時候息影閃婚，5年後經歷離婚之痛，作為單親母親，多年來都為一對子女而活，甚至放棄再婚的機會。時光飛逝，子女都長大了，她突然醒覺要為自己活多次，想在「入五」前創造更豐盛的人生。
葉蘊儀當年13歲就入行，出道幾年已紅遍港、台、日、韓，她說雖然年紀小小就在娛樂圈打滾，但父母很放心，皆因自己是宅女，就算做了明星，工作完了便立即返家，謝絕夜蒲︰「當時我只覺得呢行好好玩、幾得意，咪睇我外表嬌滴滴，好需要保護，其實由細到大我都好獨立、有主見，大部份事情都係自己揸主意。」問她可有後悔當年放棄如日方中的事業閃婚，她說︰「我做人從來唔後悔，因為我本來就好任性，鍾意做就做，所以唔會覺得放棄事業好可惜。其實所謂的任性，都是大人眼中咁評論，但對我嚟講只係隨心而發。」
有傳前夫當年因為破產，沒給予贍養費，問她一人獨力養子女是否很吃力，她說︰「坊間的傳聞唔可以盡信，我唔想一路澄清某啲嘢，喺香港地，睇吓你對金錢嘅睇法啫，我覺得足夠就ok，唔需要多。我對物質追求唔多，細個嗰陣我成日買名牌，一身都係貴嘢，呢啲嘢我以前擁有過，我好清楚自己唔係要呢啲。」離婚後，葉蘊儀曾與一個比她年長十年的男子拍拖，雙方情投意合，但埋門一腳卻無疾而終，原來因為她不想結婚︰「嗰陣我唔想影響小朋友，因為到咗談婚論嫁時，難免牽涉到細路仔，因為要一齊住，如果單單同佢相處係冇問題，但要對仔女同佢住，我覺得冇咁嘅必要，所以最後都冇選擇到，我考慮到咁樣對小朋友影響太大。因為我係佢哋榜樣，佢哋會跟住你模式做人，我唔想對佢哋心理有影響。」
葉蘊儀說現在依然憧憬愛情，加上仔大女大，可以獨立，她可以完全追尋自己的生活，她說有年輕她10年的追求者，自己也不抗拒姐弟戀，會順其自然發展︰「而家對我嚟講，搵個伴最緊要啱傾，年齡冇所謂，溝通到至係重要。」
其實離婚後，Gloria先後客串過兩套台灣電視劇，亦斷斷續續在電影客串，但她不敢全面復出，因為害怕子女成為傳媒追訪目標︰「嗰陣驚全情投入拍嘢會疏忽佢哋，作為單親媽媽，照顧小朋友係我責任，我會放第一位，所以拍嘢係玩票性質。我更加唔想狗仔隊影我嗰陣，可能連細路都影埋，咁對佢哋好唔公平，佢哋雖然係我仔女，但有自己人生，我唔想因為自己工作影響到佢哋。」她甚至沒告訴子女自己曾是明星，就算同學家長告訴子女，他們才回來問，她亦只會輕描淡寫點點頭，不會多講半句。
Gloria的兒子今年23歲，讀電腦，19歲的細女也上了大學讀獸醫，面對一對子女學業有成，Gloria坦言有種失落、空虛感，但空虛卻引發另一種動力，因而年初已蠢蠢欲動，想拍寫真留個紀念，但她想減到自己滿意才拍，所以拖了大半年才實行，更早已知會了一對寶貝子女︰「其實我一向都鍾意搞作，之前的藝術作品都係同女性議題有關，喺中國人社會裏面，可能都覺得好大膽，至於影呢輯相，我唔覺得同母親角色有抵觸，因為仔女都已經長成、懂性，他們都覺得媽咪你想做自己嘅嘢就做啦。」
尚有幾年入「五」，Gloria說希望人生更豐富，更隨心所欲地生活︰「我希望可以幫到唔同嘅女性，我係過來人，事業上少年得志，又早婚早生BB兼離婚，三十歲前已經完成晒其他人嘅一生，有些人生的經驗、想法很想與其他女性分享。」她說揀相過程很忐忑，因為每張相她都滿意，難下抉擇︰「好想將自己唔同面貌呈現畀觀眾睇，其中一輯穿上三點式披上乾濕褸嘅相，我最鍾意，因為呢個最唔似我，相中我要表達高度自信。但就算而家減咗磅，我都唔係好夠膽好自信，平時出街我都好似成個幪面俠咁，包到冚。」半年減36磅，對於一個從來不減肥的女人，確實是挑戰︰「對我嚟講係大挑戰，但我覺得掌握到，整個過程好開心，我想減肥，用幾多時間由自己控制，開頭係迫自己做，之前有細路真係好難減肥，佢哋會問你點解食咁少嘢，但因為有目標去減，所以好有動力。」
變靚再上路，是否想在事業上再有一番作為︰「我唔會諗太多，我細個入行時都冇諗過咩高峰或者要好紅。影一本相集自己可以完全操控，但做演員，很多其他因素影響，就算我想再出嚟拍嘢，但你仲有冇市場、有冇人搵你？加上而家電影同電視產量都減少，同八、九十年代差好遠，當然但如果有機會，我都想試。」
談到兩代間相處，葉蘊儀覺得作為父母，開明及溝通很重要，她自稱是嚴母，但對子女卻採開放態度︰「我哋無所不談，但我個人着重同佢哋討論、分析，會同佢哋分析事件前因後果，你哋承唔承受到先？講咗個結果你聽，你都要行，咁咪行囉。」Gloria並非怪獸家長，她從不會安排一大堆的學習班︰「我好open，鍾意就學，唔鍾意咪唔好學，好多香港父母，覺得你一定要學音樂、一項運動，但對我嚟講，識就得，例如要學游水，原因係遇溺都識游吖，唔會浸死，至於其他運動，識少少可以幫助你社交，所以學嘢得兩個目的，係求生同社交。」
撰文︰祖李
攝影︰馬太林
攝錄︰廖達燊
場地提供︰Spring Medical
化妝：Krisie Wong
髮型：Daniel
鑽飾：帝后 My Queen Diamond
|
鍾意就快D Share啦！
|
|
|