掃呢頁CODE去手機

2019年10月22日 星期二

【大豐收】李施嬅離開無綫半年發光發亮 受認同比一個獎更重要 __,李施嬅,李詩韻,無綫,

(攝影:陳慧安)
李施嬅在電視圈捱足16年,歲月不等人,沒有視后加持也顯然沒有因小失大,眼界早已大開衝出香港到美加發展獲得殊榮,頭頂國際視野光環,又一亞洲女藝人打入荷李 ...


李施嬅在電視圈捱足16年,歲月不等人,沒有視后加持也顯然沒有因小失大,眼界早已大開衝出香港到美加發展獲得殊榮,頭頂國際視野光環,又一亞洲女藝人打入荷李活,實力有目共睹。原來這顆滄海遺珠早有離心,至今年初決心離開大台跳出安逸定期出糧日子,在亳無預警下裸辭,換來的是更多機會,既可以踏上國際天橋行騷又可以和不同媒體合作,離巢半年,變得發光發亮大豐收,施嬅自信地表示:「收入同人生經驗都係好好。」



事實上2017年施嬅已憑美國微電影《Once More》,奪得European Cinematography Awards及Los Angeles Film Awards雙料影后,去年她參演加拿大電視劇《Blood and Water》,有份角逐有「加拿大奧斯卡」之稱的2019 Canadian Screen Awards的最佳女配角獎,國際名氣早已集於身上。下定決心外闖相信是明智之選,其間施嬅接收不同聲音:「好多人覺得我唔應該走,覺得我做主角,每月有糧出,出面風大雨大唔係咁容易撈,我就覺得太舒服,想挑戰自己,暫時冇嘢激勵到我個心。最後雖然唔知出面點,魔鬼與天使一樣掙扎,拍《金宵大厦》時已經有諗係咪我最後一套呢?最終人一世物一世都係要試吓。」施嬅作好準備要孤身作戰,她說:「出咗去就冇得預計,冇底薪,唔知有冇人搵你工作,所有都(係)未知之數。」然而實力為她印證一切。



離巢半年收入和工作量都大豐收,施嬅一臉滿足笑容:「有工作,見識多咗,仲可以去紐約時裝周行騷,我諗我係最矮一個model。加拿大套劇有意開續集,都有搵我,但要睇期,雖然前面路睇唔到,但我深信係好,多咗好多唔同嘗試。」這些機會比起在大台底薪更要珍惜,施嬅坦言:「我覺得敢唔敢係睇你膽量,夠膽面對就會好,我以前都好多憂慮,而家係我會衝就行,離開半年收入經驗各樣都係好好。」接下來她會繼續發展國際巿場,接拍西片,享受現時自由身工作。



施嬅2003年選美加入電視台開始拍劇生涯,默默耕耘下攀上女一之位,但因緣際遇下在踏板上難以高飛,離巢後推出主演奇幻劇《金宵大厦》反而令她一躍而上,收視和口碑成為近年大台劇雙響炮,施嬅擔演角色功不可沒,走到街上被簇擁,高呼劇中角色CoCo姐和Alex名字,她坦言:「入行以來冇試過(呢種)感覺,會好珍惜呢個時間。」網友激讚她演技大躍進,她笑言:「拍呢套劇前我喺加拿大拍完《Blood And Water》,演一位殺人黑警,緊接就開呢套,可能吸收咗外國演技。」觀眾迴響反應誠實,對於年尾台慶獎項,心水清的她認為:「好多人話TVB欠我一個獎,今次畀我嘅鼓勵、認同,比一個獎、一個鐵實物更重要,每晚臨瞓前都笑住。」



時來運到,離開大台後作品反成最大迴響,究竟是過往運氣欠奉還是時機降臨?施嬅亳不猶豫說:「每樣嘢發生有原因,臨走前五年,我拍好少劇,唔係我推劇,係遇唔到合適我劇本,5年間一年一部,令我更多機會去闖去試其他嘢,啲人可能諗冇工開時會唔開心,反而擴闊咗我視野,出去闖需要更多鼓勵同膽量,呢個劇同階段令我壯膽。」為爭取工作施嬅無懼挑戰,能夠衝出國際全因試鏡擊敗對手,成功背後有苦自己知,她說:「去出面casting(試鏡)時常面對失敗打擊都幾難受,因為香港做嘢係點名做,唔使casting,當你試完唔得,你會懷疑自己唔夠好,你唔會知自己咩唔得,需要一個強壯心同膽衝出去。」每次被拒絕令團火燒得更猛,施嬅認為面對外國巿場最大困難是競爭,並說:「若冇劃分種族幾萬人都有,就好以睇電影《La La Land》一樣,有人喺美國做緊侍應生,做緊超巿收銀,但佢哋日日都係做呢樣嘢,被拒絕都仲試緊,人哋冇我咁幸福,我有少少名氣,可以賺到錢去生活,佢哋可能每月剛剛好,夠食夠住去追夢。」



現年38歲的施嬅仍是單身貴族,入行以來情史不算豐富,並否認要求高:「有結識到有條件男性,但成日飛好忙,要培養感情難啲,好難發展,同我一齊嘅男人,應該非常之抵諗同明白我。」更不怕當上黃金盛女,嚮往現時做自由女性:「一啲都唔心急,身邊好多人已婚生咗小朋友,正因大家都咁樣,冇覺得好需要,加上好多家庭有小朋友後媽媽都好大壓力,我想享受自由生活同專注工作。」獨立女性主義的她即使真愛出現也不會為對方而停步,並表明:「我唔會成日糖黐(豆黐)住另一半,如果有另一半接受到我呢個獨立心態,有自己生活工作可以互相扶持就會啱我,但呢種男人唔會好多,會繼續認識。」





採訪:卓寶花

攝影:陳慧安

攝錄:廖達燊

場地提供:The Stadium(觀塘)

髮型:Jay@Hair





-----------------------------



-----------------------------



(攝影:陳慧安) 離巢半年收入和工作量都大豐收,施嬅一臉滿足笑容。 離巢半年收入和工作量都大豐收,施嬅一臉滿足笑容。
接下來她會繼續發展國際巿場接拍西片,享受現時自由身工作。

接下來她會繼續發展國際巿場接拍西片,享受現時自由身工作。
施嬅2003年選美加入電視台開始拍劇生涯,默默耕耘下攀上女一之位,但因緣際遇下在踏板上難以高飛。

施嬅2003年選美加入電視台開始拍劇生涯,默默耕耘下攀上女一之位,但因緣際遇下在踏板上難以高飛。
施嬅認為面對外國巿場最大困難是競爭。

施嬅認為面對外國巿場最大困難是競爭。

鍾意就快D Share啦!