【娛樂人物】
現年88歲的譚倩紅今年8月突然現身紅館，欣賞容祖兒演唱會，更睇足全場非常投入。紅姨日前接受《蘋果》專訪，她自揭最喜歡的歌手是張國榮，近年也喜歡祖兒，還大讚對方勤力。紅姨最深入民心的角色，莫過於《真情》中的「容姨」，雖然她近年也有唱粵曲，但問到會否復出拍無綫劇，她耍手擰頭：「曾經擁有就算，唔需要去到咁盡。」
採訪：戴彩煥
攝影：沈健程
相關新聞：心悒李香琴患腦退化
譚倩紅入戲行做大戲，至今已經72年，是演藝圈的老前輩，70年代曾經退休，在1987年復出拍戲，在90年代加入無綫，拍過《開心華之里》、《卡拉屋企》等經典處境劇，不過最令人津津樂道的一定是《真情》的「容姨」。紅姨日前在高山劇場接受《蘋果》專訪，提起《真情》，她說：「能夠有一個人物咁突出，唔係話代唔代表作，起碼有一席位。」
| | |
繼續踏台板唱曲
紅姨在2000年過檔亞視，2004年退出電視圈，她解釋：「電視增加知名度係快好多，但第一，自己年紀有番咁大；第二，我自己仲有個老伴，自己成日去咗拍嘢唔係幾好。」拍戲與粵劇之間，紅姨喜歡後者，就算不再拍劇，她仍繼續踏台板唱粵曲，訪問當天，她就便準備演出戲曲晚會。會否考慮復出拍戲？紅姨即耍手擰頭：「唔拍喇，TVB都搵過我好多次，自己年紀大，就算監製好乜都好，有啲嘢都唔能控制得到，譬如有場戲要趕住收工嘅，就要捱更抵夜拍，我覺得唔需要囉。曾經擁有就算啦，能夠出嚟人人都認識『容姨』咪算囉，唔需要去到咁盡。」
容祖兒今年8月在紅館開騷，「容姨」譚倩紅現身第二排，兩位「容姨」世紀碰面握手，紅姨睇足全場，還十分投入。不少人好奇紅姨是否祖兒歌迷？她親自揭盅：「我以前最鍾意聽第一個係Leslie（張國榮），第二係阿梅（梅艷芳），係我心目中嘅偶像，我覺得佢兩個台風、演出各方面都好認真，而且別具一格。」紅姨坦言兩人離世後，已很少看演唱會：「我都好鍾意祖兒，佢由出道至𠵱家，係一個好努力、好用心嘅人，佢演唱方面落咗好多工夫，我個女係佢fans，係個女請我睇嘅，咁好彩佢又託人買到第二行。」
祖兒在演唱會上見到紅姨表現驚喜，台下的容姨也一樣：「我又估唔到佢會認得我喎！原來後尾佢喺網度話第一眼見到容姨以為係幻覺，容姨點會嚟聽我唱歌呢？可能諗住我一把年紀，點會聽啲後生女唱歌，第二次佢望真啲，真係容姨嚟㗎！佢自動過嚟同我握手。」紅姨哈哈笑說：「我係識聽最後期嗰隻叫做乜嘢『神經病、神經病』（《Pretty Crazy》），我最深刻印象，點解歌都有神經病唱！」
相關新聞：麥皮花膠做早餐養生
張國榮結母子緣
紅姨拍過《雪花神劍》及《六指琴魔》等無數經典粵語長片，在1987年重出江湖，由俠女變成演媽咪角色，《胭脂扣》更讓紅姨跟張國榮結母子緣：「離開咗娛樂圈20年冇做，嗰年好似1987年，我第一部戲係黃百鳴搵我拍《七年之癢》，第二部就關錦鵬導演邀請我做《胭脂扣》。好記得嗰日啱啱拍完屋企嗰場，Leslie夜晚就喺海洋皇宮做騷，佢叫我媽咪，我話『Leslie我可唔可以聽呀？』佢即刻打電話畀佢經理人，訂張枱嗰晚畀我聽歌，我真係覺得呢個後生仔好有老人家心。我已經離開咗娛樂圈咁耐，估唔到佢對我都好好，幾時喺乜嘢場合都好，佢見到我都大聲走埋嚟叫我做媽咪。佢唔喺度，我都有去送佢，我個心真係好難過囉。」
|
鍾意就快D Share啦！
|
|
|