在葵青大白田東選區，《蘋果》發現石籬天主教聖若望小學票站，有八旬婆婆由兩名男子推輪椅到票站投票，投票後，兩男推婆婆返回附近民建聯辦事處後入內，婆婆則自行起身去公園休息。記者上前詢問婆婆，她稱並不認識該兩男子，從未投過票，平日亦沒坐輪椅，是落街散步時，遇見二人要求她去投票選1號民建聯郭玲麗，二人又主動稱會用輪椅接載她來回，她才答應去投票，婆婆稱：「我唔識呀嘛，佢話車去咪車去囉……你教過我就下次唔制啦。」
記者：周子惇 梁德聰
記者目撃兩名分別身穿粉紅色及淺灰色上衣男子，推陳婆婆到石籬天主教聖若望小學票站投票，並由後門進出票站。投票後，兩男推她返回民建聯陳恒鑌議員辦事處，並將輪椅停在辦事處門口，二人入內一段時間，之後在附近徘徊。記者守候多時，亦發現有其他輪椅接送投票情況。
86歲陳婆婆受訪稱，平日經常在區內公園休息，今早散步時有兩名男子上前表示，要用輪椅車她去投票，「（佢哋叫我）劃個1號囉。」記者問她是否本身想投1號，她一臉茫然答：「我都唔知，我唔識字嘛，我乜嘢都唔識。」在旁另一名婆婆即插咀稱：「我坐坐下唔見咗佢，佢都唔知咩事，被人車咗去。」
問到陳婆婆是否認識1號候選人民建聯郭玲麗，她稱：「唔識，冇見過。」又指自己平日雖然腳有骨刺，但沒坐輪椅，並稱：「佢㗎，我邊有輪椅。」她指抵達票站後，「我哋唔使排隊，車去蓋個印就走喇。」至於為何跟陌生人去投票，她說：「後生仔有心嚟叫妳，第二次就唔制喇。你識字但我唔識字，乜嘢都唔識，我冇腦㗎嘛。」
另一名婆婆強調：「我明白佢（兩男）咩事呀，如果佢咁樣佢犯法㗎。」又提醒陳婆婆說：「又唔識人，車妳賣咗都唔定。」陳婆婆即大聲回應：「邊個買我呀？」她稱從未投過票，「你教過我就下次唔制啦。」另一名婆婆附和道：「即係我鍾意投票就投票，你冇理由夾硬車我去。」
記者事後向正在拉票的郭玲麗，查詢輪椅接送投票事件，但她叫記者：「返辦事處等我。」問她是否認識兩男，及知否有關行為涉違反《選舉條例》時，突然有約十名男子從旁走出遮擋記者鏡頭，指郭不受訪，其中一名男子將記者推至二十米外，聲稱並不認識郭，只是路過，郭則乘機轉身，並由該班男子掩護下離去。
大白田東選區候選人包括首度參選的民建聯郭玲麗、民主黨劉貴梅及沒申報政治聯繫的劉衍銘。
|
鍾意就快D Share啦！
|
|
|