58歲黑妹李翊寧（前名李麗霞）跟梅艷芳一樣，細細個在荔園賣唱，長大後參加無綫《新秀歌唱比賽》，雖然演藝事業發展未能像大師姐般大紅大紫，但能夠有家人、朋友愛錫自己，對黑妹來說已深感滿足。尤其幾個月前黑妹得悉腦瘤是良性，而肺部癌細胞又能及早切除治癒，一切一切都讓黑妹感動落淚。健康，原來真的比任何事也重要。
黑妹日前在上水新居接受《蘋果》專訪時開心笑說：「我唔係驚cancer，係驚中風，驚要個女嚟服侍我、擔心我。我叫醫生幫我check有冇中風，3月15號check，佢話樣樣都好，不過個肺好似發現咗粒嘢，當時眼淚真係標咗出嚟，點解我年年買六合彩都唔中，呢啲就畀我中？滴完眼淚就求醫，醫生同我講，腦同肺嗰粒係match嘅話，即係擴散，再入醫院檢查啦，好開心腦科醫生話唔係，跟住我個女啲眼淚標晒出嚟，所以我好感恩，原來我身邊真係有好多人錫我。」
肺部3cm的腫瘤是惡性，但由發現到手術完成只花半個月。黑妹道：「不幸中之大幸，係早發現，所以我覺得自己係好幸運一個，真係要定期檢查，如果唔係唔知自己有乜嘢事發生。」
58歲的黑妹年幼喪父，母親獨力照顧黑妹三姊弟，黑妹不忍媽咪辛苦，13歲小學畢業後便輟學到荔園賣唱幫補家計，完全是粵語長片劇情。「我媽咪唱歌，爸爸做音樂，可能呢啲遺傳啦，我第一份工開始唱歌到而家，未轉過。其實我媽咪唔鍾意我唱歌，因為佢自己都咁辛苦，佢唔希望我踏入呢一行，但我始終都係鍾意。」
唱荔園、酒樓、夜總會再到酒廊，黑妹83年參加了第二屆《新秀歌唱比賽》，參賽歌曲是甄妮的《Dancing All Night》，同期參賽者有陳啟泰、張麗瑾、孫明光，最後呂方奪得冠軍，黑妹三甲不入。當年是否因為見梅艷芳成功而參加《新秀》？「其實我唔係呢樣嘢，當年我唱緊酒廊，有個女朋友話畀我聽而家有個比賽，乜職業都可以上去參賽，咁我咪試吓囉。」難道不想做梅艷芳第二？黑妹說：「點會唔想？但有時唔係你所想咁簡單，要天時地利人和，得唔到任何一個獎項都好，喺呢個比賽裏邊，我無形中身價係高咗啲，我初初未識諗時會好失落，原來唔係，當你比賽完咗之後，跟住我返番去酒廊嘅時間，我全部所有嘢係upgrade晒，有一倍，譬如百幾蚊去300幾（唱一場酬勞），一倍㗎，個電視框框會令到人有反應、有效果。」
其實當年選完《新秀》後，華星唱片曾邀黑妹簽約，但黑妹拒絕。「我參加《新秀》嗰時已經唱緊5、6場（酒廊），但價錢好低，100幾200蚊。當我參加完《新秀》之後，公司就問我簽唔簽，我就話唔簽喇，因為我真係要搵真銀，你簽咗又未必捧自己，因為我阿媽、我個女都要我養，我仲有兩個細佬，簽嘅話我（未來）都唔知係點，但唔簽嘅話，我就知道自己條路點行，即係搵錢囉。」
「好坦白講，我當日一出嚟唱歌，都好想自己係梅艷芳、甄妮，我要做superstar，其實就算你點努力，唔得就係唔得。我唱緊酒廊時，我個心好想去錄一隻唱片，我就搵啲唱片公司，佢話：『你都黐線，我晚晚100蚊都聽到你唱歌，我使乜買你隻碟呀？』呢句說話令我成個意志消沉，一盆冷水，咁我惟有喺舞台上，喺每一晚、每一日喺酒廊發揮自己，我就唔諗嗰啲喇，我諗我每日點樣由100蚊唱到200蚊，200唱到300……」
想起當年種種，黑妹忍不住掩嘴哽咽，不過，也就是當年這盆冷水，令黑妹創造了自己風格。「全部唱林子祥，唱勁歌，一上台就《10分12吋》，快歌勁歌，就係咁樣，個個先至話黑妹好勁呀，黑妹唱歌好好氣呀，一上台45分鐘唱晒快歌，唔停嘅，其實唱酒廊真係最辛苦，每當一個歌星出一隻歌，你即刻要學，唔學你真係唔係唱酒廊，係唔可以慢過人哋。」
酒廊歌廳品流複雜，遇上惡客又如何應付？黑妹笑說：「佢叫你點，你一定要應佢、同佢傾，如果你唔同佢傾，當佢唔存在，佢一定玩嘢，尤其是飲多咗兩杯，有啲位我全部唔講嘢，唱45分鐘快歌完結咗佢，大家鬥嘈！我哋由紅褲仔一路打上嚟，乜嘢環境都見過，所以我應付到嘅。」不過，見慣大場面的黑妹，也有驚到腳震經歷：「呂珊同我同場，突然有人蒙晒絲襪揸住西瓜刀，好似拍戲咁，但佢唔係嚟斬我哋，佢斬啲枱客，當時梗係驚啦。」
千禧年代，黑妹開始兼做幕後製作，包辦香港、外地大大小小歌唱騷，不少藝人如羅敏莊、喬寶寶等也跟黑妹搵食。「唔好咁講，我只係畀個平台大家開心有錢搵，有時佢哋都好抵得諗，個個都好錫我。其實我冇簽過喬寶寶（經理人合約），但佢個心永遠擺咗我喺度，啲人話我好多細佬妹，係咪個個簽晒佢哋？我冇簽，一個都冇簽，點解呢？對我好，就一世都對我好，對我唔好，簽咗都係對我唔好，咁何必要簽咗嚟綁佢哋呢？總之有飯開、有嘢做，大家一齊做，我唔需要同大家簽約，佢哋一樣對我真心，呢樣嘢係最難，所以呢樣嘢我好開心㗎。」
黑妹唱歌賺到盤滿缽滿，曾經於白建時道購入豪宅，跟大劉劉鑾雄做鄰居，被視為圈中隱形富婆。但黑妹謙說：「好多人話黑妹你好有錢，係，我靠唱歌搵過好多好多錢，但我使亦使過好多錢，我鍾意使錢，鍾意朋友。我身邊細佬妹、好多朋友嚟到食飯，我一定食好，出去食又係食好嘅。」當年女兒跟女婿住白建時道，黑妹住西半山，後來為讓外孫有更多活動空間，黑妹將港島區豪宅賣掉，跟女兒一家搬到新界區居住。
黑妹與獨生女的生父早早分開，之後在加拿大再婚，最終又是離婚收場。「我先生（前夫）對我好好，奈何我貪玩，我都係要返番嚟香港。」現時黑妹一個人在上水1,400呎大宅居住，女兒、女婿和兩個乖孫住附近，方便照應。黑妹笑說：「一個人舒服好多㗎。」唱歌之外，黑妹偶爾會參與劇集演出，如近日大台播映的《牛下女高音》，但她坦言拍劇只為過癮：「拍劇我真係好驚，叫我喺舞台揸住支咪點都得，但一講『Action!』我就死咗喺度。」
採訪：魯吉
攝影：林賓尼
攝錄：馮嘉銘
|
鍾意就快D Share啦！
|
|
|
