喬寶寶明年離開土生土長的香港，到蘇格蘭與家人團聚，訪問當日，他帶《蘋果》重遊住了42年、鄰近廟街的舊居：「我一出世就住呢度，老竇嗰時係租，後來冇得租，一係買一係搬，老竇做多份工，媽咪又去工廠做，用40萬買返嚟。2012年我因為老婆攞唔到特區護照，我就用400萬賣走。」
相關新聞：【意興闌珊】河國榮拍90劇離巢
緊守出生地
喬寶寶長大後選擇扎根於香港，兄弟姐妹則陸續移民：「我話緊守崗位，留番喺自己出生地，因為唔捨得，雖然去過英國、加拿大，但冇一個地方及得上香港。」會否覺得自己是香港人？喬寶寶坦言：「其實你邊度出世就係邊度人，香港人係咪一定係中國人呢？係咪白人、黑人唔得呢？」
喬寶寶以印度裔真港人為榮，也為同胞平反：「印度人喺香港超過150年，對香港貢獻好大，但教科書冇寫我哋對香港嘅貢獻，所以好多香港人以為我哋嚟到爭飯食或破壞。香港最早嘅紀律部隊，最多係印度人，你睇到天星碼頭都係印度人將香港同九龍接軌。甚至𠵱家最前線掃街、保安，好多做嘅都係南亞裔，佢哋都好勤奮。」
曾在懲教署任職16年的喬寶寶，對現今南亞裔問題感受很深：「香港未有難民潮前，好少南亞裔入黑社會。」他分析問題核心：「我1989年入職懲教署，當時越南難民最高𥧌期，政府開白石、萬宜好多船民營；𠵱家嚟一萬人，其實可以擺船民營再甄別，畀行街紙但唔畀人做嘢，最傷係我哋，可能偷咗我哋身份證去應徵。我哋百幾年形象俾佢哋破壞晒，我哋都冇辦法，好多人話出吓聲，但政府聽先得，我哋都好無奈！」
|
鍾意就快D Share啦！
|
|
|