韓君婷於97年當選亞姐亞軍入行，在亞視認識了六合彩王子蔡國威，兩人識於微時，22年的友情不變，雖然威仔已過檔大台，韓君婷也淡出幕前，但他們仍會不時相約gathering，日前晚上8時許，《蘋果》就在九龍城碰到他們一身街坊裝現身，素顏韓君婷着牛仔短褲踢拖，威仔就T恤短褲，他們先被發現在一間平民化的泰菜餐廳吃晚飯，當時餐廳內坐滿食客，他們坐貼近牆邊的細枱，其間邊吃邊傾偈，韓君婷露出四萬笑容，二人醫飽肚後便由韓君婷埋單，隨即離開。
俗語說「飯後一支煙，快活過神仙」，威仔和韓君婷離開食店，馬上到附近便利店買煙，然後即站在街上暗角位，兩人邊吸煙邊吹水，即使街上有其他途人，他們煙癮大發懶理旁人眼光。威仔和韓君婷止癮後，再逛了附近的家品店，可惜未有收穫，他們再轉場到就近的超級巿場，威仔負責推手推車，他們專攻零食貨架，揀了大堆餅乾等食物，由威仔付款及拿東西，之後他們由九龍城漫步行到新蒲崗的東頭邨，路經一間凍肉店，兩人又好奇地停下望凍櫃，但卻未有幫襯。兩人沿途又再煙癮起要chur煙，這次未有停步，邊行邊吸，當到了公屋樓下，他們忽然避忌起來，韓君婷先行去按密碼，威仔才上前開閘門，舉動好合拍，然後齊齊上樓。
韓君婷跟威仔的合拍程度，猶如情侶，韓君婷回覆《蘋果》否認暗撻威仔：「我哋合拍，好朋友好朋友，掃貨掃到超攰。」他們一早吃飽泰菜，不過回家路上都不停買吃的東西，看來兩人都非常為食，韓君婷笑言：「食完飯都要有甜品㗎嘛，咁啱我有超巿現金券，咁咪一齊去掃貨。」她表示二人都愛入廚，本想到家品店買焗蛋糕的工具，但未有合適所以沒有買。
採訪、攝影：朱志聰、梁繼光
|
鍾意就快D Share啦！
|
|
|
