記者 許偉賢
反修例衝突長達半年後仍然持續，北京與林鄭至今拒在撤回修例外作讓步，反之將風波看成香港出現的深層次矛盾，似認定解決經濟問題，香港便會平靜，「我覺得今次唔得囉！」田北俊指今次反修例者包括不少中產及較富裕階層：「佢哋唔係為咗錢去表達訴求，係為公義同政府唔理市民訴求。」他也認為回歸以來「一國」力量越來越大，「兩制」力量卻越來越細，才令市民反應如此大，深層次矛盾顯然屬政治範圍。
田指，就算林鄭有派糖紓解民困等經濟舉動，也無助市民重拾對政府的信心，始終最重要仍是解決兩大政治問題，重啟政改外，應該設立獨立調查委員會，「警民衝突，我哋要解決㗎喎，還市民公道好，還警察公道都好，示威者同警察兩邊都要查。」他批評林鄭欲以檢討委員會代替，「檢討係檢討乜啫？唔通仲檢討成唔成立獨立調查委員會呀？⋯⋯檢討又冇權查嘅，唔通你搞完出嚟，以為拖多幾個月，市民就會忘記呢件事咩？」
商界不覺林鄭尚在政治方面「話到事」
「商界唔覺得今時今日，林鄭仲喺政治方面話到事囉。」田以「好慘」形容仍然留任的林鄭：「佢而家個民調評分仲低過（任何）前特首，低過20分，似佢咁好勝嘅人，我諗佢好無癮。」指市民若對特首失去信任，政府實在難以推出任何政策，「咁你其實係累死晒其他局長，個別局長有啲可能係做得幾啱。」
他預計施政癱瘓至少延至明年立法會換屆前，「如果佢（林鄭）管治到2022年，自己都寸步難行啦，佢亦都做得好辛苦，因為無論你幾盡力都好，市民對你冇好感，就算你做咗好嘢，都會打個折頭」；以往特首萬人簇擁，田相信今後無人會專登「黐」特首，「黐埋你度，又唔慌有咩好」，並指商界除咗「睇」北京風向，也「睇」市民意向，「好多商界都係好精，如果你呢個特首，行出街成日俾人噓，我都費事黐埋你度啦」。
批評建制派「一吹雞即歸隊」令施政更弊
田不忘批評部份擔任人大與政協的商界向中央反映意見時太過「識做」，「只講入面覺得啱嘅意見」，認為建制派「一吹雞即歸隊」的作風惹市民不滿，也可能令施政更弊，更甚是令一些精英拒入建制，不願參選，「如果選到，你一吹雞就要歸隊，講嘢又話唔得嘅，我點解要同你做呀？我真係得閒無嘢做呀？」長遠更影響建制陣營的議政質素及公信力。
|
鍾意就快D Share啦！
|
|
|