掃呢頁CODE去手機

2019年12月26日 星期四

娛刺撈飯:吼住「基男」硬倔倔 蔡思貝柔情似水食Hubert __,蔡思貝,

「基男」,即係基本好男仔呀!港姐界嘅「緋聞女王」蔡思貝秘撻胡鴻鈞(Hubert)有圖有真相,斷到正一正!唔止同佢哋情非泛泛嘅余德丞同許廷鏗(Alfre ...




「基男」,即係基本好男仔呀!


港姐界嘅「緋聞女王」蔡思貝秘撻胡鴻鈞(Hubert)有圖有真相,斷到正一正!唔止同佢哋情非泛泛嘅余德丞同許廷鏗(Alfred)一副開始懷疑人生咁嘅樣,連最愛剝花生嘅粉絲都錯愕到核爆,重複問「點解嘅」、「乜Hubert唔係咩嘅咩」,或者有諗多咗嘅,會認定Hubert「一定係轉性改運啦」。


嗱嗱嗱,做人要公道啲,對事要Fact check先, Hubert係從來、絕對冇認過佢係「咩嘅」,曾幾何時,都傳佢溝過Super Girls個Heidi、鍾欣潼、林欣彤、仲有吳若希,無奈單單緋聞冇人信,更無奈嘅係,佢同Alfred嗰單緋聞就冇人唔信!Nuts哥絕對相信Hubert係「基男」,即係「基本好男仔」,同貝貝搞埋後,仲加個「bfable」標籤添。


發電收兵築人鏈


點解?隨傳隨到、貼錢做司機唔在講,同貝貝「10日見3鑊,唔見好失落」呢吓先深情,最欣賞佢日光白白都鬼拍後尾枕,認咗同貝貝「在一起」,呢啲唔叫做愛,唔通叫做假咩?立即幫Hubert有請小鳳姐,賀佢唔使再畀人誤會,貝貝咁大功勞,下次唔好請食魚蛋咁「輕擎」嘞,餵食洋腸啦,呢排好興!


Hubert喺《降魔的》飾演「石敢當」,今次「精靈」被收服,又唔係冇理由喎,將愛情觀套落李小龍嗰句名言「Be Water,My friend」,意思即係同流水一樣,可剛可柔,充滿變化。喺Hubert事業低潮,雪到硬倔倔之際,有柔情似水嘅貝貝發電呵番,將冰山劈開,攣都變直。Main point係咪當貝貝係流水個「流」,佢入行6年,冇花冇假,緋聞男友堅係10隻手指數唔晒,連埋Hubert已經係第11位,夠築人鏈有餘。


灌「綠水」撇丞丞


講開貝貝緋聞前度余德丞,佢之前踢波踢到入ICU,貝貝搭火箭直達醫院探病,以為患難見真情,點知情真但意假,其實丞丞係醒嘅,應該一早就Feel到被灌「綠水」試問有邊位女朋友會遲足兩個月先得閒同男友補祝生日,仲要送個壽星仔唔Like 嘅芝士蛋糕, 丞丞呀!乜你花名叫「懵盛盛」咩?


不過講到最傷,都唔夠Alfred痛,畀貝貝截咗張「外賣單」!Hubert都算係Alfred御用Food Panda, 送過外賣上許宅,畀人斷糧事小,貴為牙醫被生剝棚牙事大,不過君子報仇十年未晚,所謂江湖事江湖了,情場事宜私了,既然大家係麻雀腳,不如搵日叫Hubert約埋貝貝、余德丞開枱論英雄,到時Alfred 誅死貝貝,咁咪乜仇都報晒囉!

來源 source: http://hk.on.cc
鍾意就快D Share啦!