掃呢頁CODE去手機

2020年1月11日 星期六

【三入三出】64歲蘇施黃告別商台 爆曾被張國榮胞姐投訴 __,張國榮,蘇施黃,

 攝影:陳俊強
一份工打足41年,證明真的很愛很愛!蘇施黃在商台三入三出,離開後又重返,前後做了41年,現64歲的阿蘇決定第四度告別商台,去年12月31日是lastd ...




一份工打足41年,證明真的很愛很愛!



蘇施黃在商台三入三出,離開後又重返,前後做了41年,現64歲的阿蘇決定第四度告別商台,去年12月31日是last day。



阿蘇在商台有多個風光時期,「六啤半」、《煮嘢蘇》、《是他也是你和我》⋯⋯「其實係段段時間都開心,喺電台真係好開心,好啱我性格,細個唔鍾意讀書,盲字都唔識隻,大鑊啦,成日都話有份工搵到食就好,就係電台呢份工,多謝上帝,我覺得係佢賜畀我。」



不過,直腸直肚的阿蘇,主持風格得罪人多稱呼人少,入行以來收到不少投訴,連哥哥張國榮的胞姐張綠萍都投訴過阿蘇,「喺我20幾歲,張國榮家姐張綠萍投訴我,因為我喺節目講『鬼佬』,佢寫信畀何佐芝先生,話蘇施黃非常之冇禮貌叫外籍人士做鬼佬,我心諗你係咪儍㗎,全香港九成人都叫過外籍人士做鬼佬,咁係咪唔尊重意思呢?你咁投訴,如果我覺得好hurt,我就係儍嗰個。」



當日是俞琤通知她被投訴,阿蘇回想情景:「我好乸驚,我唔係驚張綠萍,死啦,我應該點樣答何生呢,佢係老闆,點知有日我搭緊lift,佢行入嚟,大家冇得走,我話『早晨何生』,佢好cool:『我都會咁講㗎,阿蘇!』嘩,嗰道lift門一開,我行到出去(振臂高呼):yeah yeah yeah! 我幾開心吖,老闆好體諒,唔會因為名人投訴就指摘你,佢會諗吓嗰件係乜事,所以其中一個好多謝係何佐芝先生。」



形象惡死的阿蘇,聽眾不時被鬧被cut線,連拍檔都照寸照窒冇面畀,「唔緊要嘅,唔開心唔好做我拍檔囉,好公道,大家知我出口係好惡毒想對你唔好,定係我都想你好,只係用惡毒方式?我成日收投訴,唔會唔開心,點解我到今日60幾歲,啲人話我冇乜好,就係份人真,呢啲係佢哋客套說話,乜嘢叫真,我真係好Q惡,如果你識欣賞呢個咪好處,唔好處就係你使唔使咁寸,我真係唔介意你嘅諗法,只係介意你做得好唔好。」



在商台41年,阿蘇都有投訴:「我覺得商台好嘥,當時播唱片,當我再返嚟,發現商台唱片唔鬼見晒,library做咗903 workshop,有人答我唱片丟晒,我覺得有啲失望,唱片係我哋之前年代、可能陳任、周聰儲落,冇可能再搵到嘅黑膠碟,有啲歌可能好重要,但丟晒,我覺得商台music library其實幾可笑,我屋企CD可能仲多過商台,我覺得可惜嘅。」



今次離去,阿蘇坦言冇機會再返電台:「真係同電台講拜拜,今次真係行出去唔會行返嚟,唔會唔捨得,向前望,唔好向後望,向後望有鬼,哈哈!」



離開商台後,阿蘇轉做SOL(Star Opinion Leader)拍自家節目《教煮蘇》,「俞琤話你大個啦,從2020年開始,唔好再鬧人,你應該讚,好嘅話畀人知,唔好嘅不屑講,我好同意,我覺得鬧嘅過去60年鬧晒,2020開始改方式面對人生。」60多歲才從頭學起的阿蘇,由買咪、買腳架都一腳踢,「唔識要慢慢摸,一個俾人服侍慣嘅人,自己去買咪係惆悵嘅,買晒預備走,又行番上去問點set,學得三腳架又唔記得問人啲咪。我成日覺得,煮餸已經要專注,仲要顧埋攝影機,好難,呢啲唔慣。」



2019年12月31日,阿蘇在商台的last day,請了舊上司楊素珊做《大玩派》嘉賓,最後一集,阿蘇不離嬉笑怒罵風格,尾聲時憶起故友張國榮,阿蘇難得感性,真情流露。



「喺商台做節目喊,有個好特別經驗,講起都想喊,就係我老友走嗰時,我老友喺4月1號走,但我返緊商台,治喪委員會得3個人,陳淑芬、施南生同我,不但要處理喪事、印書、嘉賓所有細節,朝早一擘大眼要去加多利山(哥哥故居),之後返工,夜晚又要去,因為好多人去佢屋企,所以我又要煮飯,每日如是,心情好痛!」阿蘇說。



「記得每日返電台,去CEO度借佢間房,喊到收唔到聲,喊完先做節目。」強人都有脆弱時候,公私分明的阿蘇,將眼淚加上開閂掣,「每次喊5至10分鐘,喊完快趣收聲,着紅燈,若無其事歡樂一番做節目。」



最後,阿蘇送上「六啤半」 曾路得歌曲《願》給大家:「希望香港可以平平安安,日日大家開開心心。」節目完結,阿蘇跟拍檔逐一擁抱,Tristan流下男兒淚,阿蘇拆同事和聽眾的禮物,包括俞琤送的通勝日記、哥哥粉絲送的生果,還貫徹惡死形象說:「有個聽眾禮物郵票唔夠錢,要我畀$22.8去拎,我話畀你聽,我係斗零都唔會拎出嚟,儍㗎!」玩完一輪,阿蘇才正經地鞠躬說:「同所有聽眾錫一啖,多謝大家咁多年支持。」



熄燈,離開直播室,跟41年電台生涯說再會!



撰文:余燕儀

攝影:陳俊強

攝錄:沈健程



攝影:陳俊強  上月31日last day,告別商台。 上月31日last day,告別商台。
 阿蘇最後一日主持節目,十分風騷。

阿蘇最後一日主持節目,十分風騷。
 同事跟她合照留念

同事跟她合照留念
 同事送上阿蘇至愛的冬甩和pizza。

同事送上阿蘇至愛的冬甩和pizza。
 Tristan難捨阿蘇,哭了。

Tristan難捨阿蘇,哭了。
 同事跟她吻別

同事跟她吻別
聽到何佐芝說:「我都會咁講㗎,阿蘇!」她開心到大叫。

聽到何佐芝說:「我都會咁講㗎,阿蘇!」她開心到大叫。
收到俞琤禮物

收到俞琤禮物
 正式跟商台拜拜

正式跟商台拜拜
 在商台門口拍照留念

在商台門口拍照留念
 阿蘇駕車離開商台

阿蘇駕車離開商台
 阿蘇上月倒數離開商台(互聯網圖片)

阿蘇上月倒數離開商台(互聯網圖片)
六啤半當年在商台叱咤一時(互聯網圖片)

六啤半當年在商台叱咤一時(互聯網圖片)
商台創辦人何佐芝是阿蘇最感激的人之一。(互聯網圖片)

商台創辦人何佐芝是阿蘇最感激的人之一。(互聯網圖片)

鍾意就快D Share啦!