早前Daniel在九龍灣接受《蘋果》獨家專訪，過往甚少談及前妻陳法拉的他，坦言只想說一次，往後亦不想再談論。問他為何接拍這個節目，他說︰「而家係一個時候，唔需要再去迴避，唔想再尷尬，寧願講一次，可以以後都唔使再講。」薛世恒和陳法拉於2007年傳秘婚，當時二人一直避談，及後逐步浮面，二人曾一齊出席活動，可是2013年傳出二人離婚消息。失婚6年，Daniel首談感受，問他是否不想面對？他說︰「都係，想正面咁面對番件事，唔單止係感受，係一個經歷，我想從呢個經歷講啲正面嘢，因為呢個係一般人唔會想講嘅話題，但我情願正面去講，其實都唔係咁恐怖啫！」
今次他隨製作團隊遠赴烏克蘭，他笑指此行的最大得着，就是不斷談離婚的話題，反而令他感覺輕鬆，他說︰「咁多年好少出自我把口，尤其喺鏡頭前，而家喺鏡頭前不斷講呢樣嘢，講到唔覺得有任何避忌。」問他之前離婚的那段日子，最辛苦是否不能說？他說︰「其實我有好多機會去講，我真係好多謝我啲朋友，佢哋咁有耐性，不斷聽我講聽我訴苦，我只係冇同傳媒講，私下不斷煩我啲朋友。」離婚的經歷對他是個考驗，「最辛苦係要長大，唔好望自己咁多。唔睇自己咁多，多啲睇人哋，其實就冇嘢，要學呢個功課唔容易。」
一段婚姻終結，當事人總要放下，「要用年嚟計，好幾年時間。」那時他的朋友苦口婆心，叫他給自己一個期限，期限過後別再想，但他覺得不可行。問他是否很難受？他說︰「最難受係，呢個係事實，冇人結婚會想離婚。」Daniel指自己的父母關係好好，故在他的世界中沒有離婚這回事，他苦笑說︰「唔會相信發生喺自己身上。但當呢個係事實，我唔知點去處理同接受。因為你嘅另一半，分分秒秒做緊一個決定，唔想再繼續，件事就變得非常真實。」
換言之，Daniel沒想過離婚︰「冇人會想離婚，唔係唔愛，係冇力再去相處，太攰」當日可有挽留過？他說︰「挽留？絕對有，因為我冇呢個概念，所以一開頭我唔覺得係事實，嗌交啫！咪o氹番囉，但係o氹吓o氹吓，變成⋯⋯等。」是否女方提出離婚？他說︰「咁就唔好咁講，我覺得真係冇人想。」
結得婚始終有感情，當分開難免會傷心，「真係...會破壞形象，哈哈！真係好唔開心，好多謝身邊嘅朋友，佢哋好support我。人係知道咩應該做，咩唔應該做，我夠知日日要早起，但有冇力呢？（冇力到咩程度？）我諗如果去睇醫生，醫生會話有抑鬱嘅程度。（你收埋自己？）唔可以話係收埋，都要繼續工作，但好似機械式咁做嘢⋯⋯（頹廢咗幾耐？）我冇數，只可以用年嚟計。」Daniel是基督徒，幸好信仰幫他走出陰霾，更幫他找出答案。
離婚已成事實，夫妻變成摯友，總好過變成陌路人，難得薛世恒和陳法拉，再見亦是朋友仍有聯絡。去年5月陳法拉再婚，薛世恒比任何人更早獲通知。面對前妻再婚，總有點酸溜溜吧！他有點尷尬說︰「你話冇感覺就假，我當然戥佢開心。其實亦係一種釋懷，佢有個美滿嘅開始，我就少咗一樣顧慮。點解之前我話係時候，唔使再擔心以前嘅事同人。（放低咗？）都放低咗好耐，係有啲唔同，唔知點樣去形容。」
對於過去的種種，Daniel可曾說過些話或做過些事，令他後悔？當他聽到「後悔」二字，便嘩了一聲並深呼吸，靜了片刻說︰「我係個向前望嘅人，無謂去後悔，當然，一隻手掌係拍唔響。」
採訪︰羅婉玲
攝影︰陳慧安
攝錄︰廖達燊
場地︰LL Production House
|
鍾意就快D Share啦！
|
|
|