魏駿傑的強國嫩妻張利華，被《壹》仔獨家踢爆上演「安心偷食2.0」，喺的士車箱啜爆老外Banker。事件曝光後，佢即刻漏夜搬走，離開「老公」同個女位於西貢嘅家。昨日年廿九（1月23日），張利華竟然返西貢「屋企」，仲拖埋個女走，唔通想同魏駿傑爭？
偷食爆煲後，張利華同《壹》仔講：「一有時間我會陪個女，小朋友係會共同照顧。」以為佢口噏噏當秘笈，話晒以前撞見湊女嘅，十有八九唔係魏駿傑就係傭人姐姐，兩母女連體畫面唔算多。估唔到張利華離家大約十日，佢就出現盡返阿媽本份，帶個女出街食餐團年飯。武漢肺炎愈趨嚴重，張利華都唔敢掉以輕心，幫個女戴好口罩先出門，有返少少阿媽應有嘅樣。
去到餐廳，負責發辦嘅係阿女，只得9歲已經有獨立模樣，想像得出老豆北上搵食、阿媽外遊happy時，就算有外傭姐姐陪伴，佢都識得照顧自己。例如，日前見到佢同老豆帶埋傭人姐姐入完貨，唔似其他港孩繑埋對手乜都等傭人姐姐做，而係主動幫手拎重物，好懂事。
之後兩母女並肩而坐有講有笑，似乎無因為阿媽張利華過往經常唔黐家等問題，影響到彼此關係。然而張利華仍有改善空間，難得親子時間，傾唔夠一陣偈就走開，留低個女呆等。個女見到侍應上菜，本來笑晒口，仲企起身四圍搵阿媽開餐，點知發現阿媽不見蹤影，小朋友嘅笑容就咁9秒9消失！
張利華去咗邊？原來行埋一二邊傾電話，發短訊，唔知係聯絡緊老外Banker，定係follow緊張保單呢？
張利華偷食事件爆煲後，同老公魏駿傑閞係正式決裂，二人開始辦理離婚，早前有周刊指張利華並不在意女兒撫養權，或者鍾意自由自在，並且已有新戀情嘅佢，寧願選擇得閒現身湊下女。好似呢日咁，食完飯返歸換過件衫，再帶個女玩滑板車順便放埋狗。
《壹》仔上前同佢傾兩句：「（搬離後第一次返嚟探個女？）因為我好掛住個女，個女都好掛住我㗎，我始終係媽咪，點會唔錫個女呢。（係咪第一次返嚟探個女？）我哋日日都有傾電話嘅。（係咪搞緊離婚手續？）呢啲唔講住，呢啲家事嚟㗎，希望俾多啲空間我哋。（係咪住喺四千萬嗰間屋？）嗰個係朋友屋企，暫住。（唔係你男朋友屋企？）朋友屋企，個個都知係朋友屋企嚟嘅，所以唔好打擾到人哋。（小朋友情緒ok嗎？）都ok。」
【壹週刊直播平台 ChannelNEXT】
全城抗暴 區區論壇同你深度剖析
立即睇
-----------------------------
【升級壹會員登記站 為你解疑難！】
親臨旺角做升級壹會員，即送「香港人：抗爭之夏」限量明信片
詳情地址
|
鍾意就快D Share啦！
|
|
|
