掃呢頁CODE去手機

2020年2月22日 星期六

【富貴老婆擊退小三】洪欣揸7000萬磚頭 張丹峰打回原形做跟得老公 #小三 #張丹峰 #洪欣

49歲嘅洪欣同細佢11年嘅老公張丹峰,舊年鬧婚變,盛傳張丹峰背妻偷食經理人畢瀅,搞出連串風波,最後畢瀅辭職退出先至平息。成功踢走小三,洪欣有嘅係實力! ...






49歲嘅洪欣同細佢11年嘅老公張丹峰,舊年鬧婚變,盛傳張丹峰背妻偷食經理人畢瀅,搞出連串風波,最後畢瀅辭職退出先至平息。

成功踢走小三,洪欣有嘅係實力!實力係咩,咪就係「Money」囉!佢呢個圈中小富婆,喺香港手持嘅物業唔少,包括禮頓山豪宅,同埋跑馬地山村道聚文樓,單係呢兩個物業,市值大約七千萬,以女人仔嚟講,好有實力喇。張丹峰點捨得洪欣,同佢啲錢呀?玩夠,識知錯,氹掂老婆,挽回婚姻,又係一條好漢!

洪欣同張丹峰兩公婆和好如初,呢日合體shopping,見到張丹峰打回原形,做番洪欣個跟得老公。

洪欣喺便利店買完餅,又入咗糖水店買外賣,一樣係老婆畀錢,張丹峰喺店外等,拎咗外賣唔係返屋企,係去潮店shopping。一入去,洪欣就放低手袋,叫老公坐低等,佢自己就左睇右睇,好專心咁揀心頭好。唔使一分鐘,洪欣就睇中條綠色長褲,試上身後十足模特兒咁行嚟行去,等老公畀評價。見洪欣未扑槌,店員拎第二條綠色褲畀佢睇,佢又拎條黑色嘅嚟襯,結果佢又入去試埋另一條綠色褲。

戇居居嘅張丹峰,等到周圍望,聽住店內音樂搖吓搖吓,打發時間。終於等到連佢都按捺不住,走上前拎條褲入去試,試完又踎喺地下揀其他款,不過,揀極都唔啱心水。

最後,洪欣揀到兩條綠色褲做戰利品,準備埋單時,張丹峰又話要試對波鞋,試咗又唔係好鍾意。

武漢肺炎肆虐下,零售業影響好大,洪欣只係買咗兩條褲,有兩個人招呼佢。另外,店員仲好細心咁畀多個大袋佢將買落嘅外賣放晒入去,十足vip咁。

Shopping完,兩公婆行返屋企嘆糖水,成功踢走小三,張丹峰打回原形做跟得老公,或者係最好嘅結局。

講番洪欣呢個富貴老婆,佢真係投資有道,16年以4708萬購入禮頓山豪宅,依家市值大約6000萬。而喺13年,以765萬買入嘅跑馬地聚文樓,依家市值大約1000萬。兩層樓都有賺,幾有眼光。



----------------------------

【壹週刊 武漢肺炎專頁】

緊貼防疫資訊!口罩訂購情況、確診個案、病徵潛伏期、封關國家名單、保險點賠?

與你遠離瘟疫 睇清官謊!

立即睇

-----------------------------

【壹週刊直播平台 ChannelNEXT】

專家教你自保攻略|口罩點揀|防疫點做

立即睇

-----------------------------

疫情追蹤,最新消息,Follow 壹週刊Telegram:

點擊追蹤


鍾意就快D Share啦!