畀呢個情況嚇親。
香港正面對武漢肺炎侵襲，人人為咗一罩傍身叫苦連天。藝人梁嘉琪為咗慳住啲口罩使，隔幾日先出門一次去購買糧食，之前已經聽過有搶糧潮出現，佢話估唔到依家超市連廁紙都畀人搶晒！佢留言話：「為咗不浪費囗罩，幾日出門補糧一次，發生乜事，去到冇米冇紙巾，大家定啲嚟，大家都唔想炒完囗罩炒廁紙㗎！」佢仲提醒大家買嘢入貨最緊要夠用就好，唔好屯積晒啲嘢喺屋企。另外佢喺街見到有口罩賣，冇包裝唔知來源嘅賣緊$299五十個，有品牌嘅賣緊$100三個，就連似係自家製嘅消毒酒精都賣$65一支，梁嘉琪最後話希望唔好經歷完炒口罩之後，要面對炒廁紙嘅情況。
類似嘅情況喺好多區都同樣發生緊，樂隊朱凌凌嘅成員朱栢康就上載咗一張黑白相，見佢企喺超市面對住空空如也嘅貨架個樣好無奈。而歌手李蕙敏就上載咗幾張類似超市貨倉嘅相，入面有大量廁紙存量，希望大家唔好咁擔心去搶購。
來源 source: http://hk.on.cc
|
鍾意就快D Share啦！
|
|
|
