2020年2月12日星期三

【頭條追蹤】帶兩個女陪老婆返鄉過年何猷啟返港「無罩」與友聚會 #何猷啟

【頭條追蹤】帶兩個女陪老婆返鄉過年何猷啟返港「無罩」與友聚會

何生食完飯同成班朋友一齊行去停車場，可能見只係十幾分鐘所以無戴返口罩。

新冠肺炎(前稱武漢肺炎)疫情日漸加劇，食物及衛生局長陳肇始仲話未來兩星期是抗疫的關鍵期，強烈勸籲戲院及卡拉OK等娛樂場所暫停營業，亦避免打麻雀及聚會，以減低病毒人傳人的風險。本周日下午，賭王何鴻燊三太陳婉珍的兒子何猷啟同老婆GiGi及一班朋友去淺水灣食Tea，食嘢梗係唔戴口罩，但何生食完嘢都冇戴返，翻查資料，佢同老婆及兩個女一家四口返過內地過年，佢話唔係去武漢，去邊唔講，去咗幾多日唔講，有無自我隔離唔知，咦，咁樣呀。採訪:張詠森、譚壹致

賭王何鴻燊家族去年好多喜事，子女相繼結婚生仔，開枝散葉。包括去年2月，三房兒子何猷啟自爆已跟女友在外國秘婚，其後再爆出已為人父，並於4月承認已有一個11月大的囡囡Tittania；10月再誕下二女Tylia，兩年抱兩，生產力相當強。

兩公婆疑似有拗撬

過年前，何猷啟曾到醫院探望賭王，當時佢表示新年會陪太太返內地拜年，仲會帶埋小朋友去，對於武漢爆發肺炎，佢就話：「我哋唔係去嗰區。」問到幾時出發，佢話唔講喇。本周日下晝四點半，見到何生同老婆及朋友一行八人去咗淺水灣食意大利菜，眾人食得好開心，無口罩情況下有講有笑，貼住老婆坐嘅何生發言量都幾多，食咗個幾鐘埋單，眾人步行往露天停車場，由餐廳去停車場十幾分鐘，同老婆行到離行離迾嘅何生無戴口罩，話晒內地返嚟喎。