教小朋做戲激發導演夢 余香凝預告情人節做電爆膽黐飯食
余香凝（Jennifer）最近推出新歌《無得比》，希望藉歌曲鼓勵聽眾欣賞自己，不要活在被比較的陰影之中。是次Jennifer除了有份構思MV內容，更被激發出潛在的導演魂，不時指導小演員做戲，過足導演癮；她亦發下豪語，寄望下次親自執導個人MV，朝導演之路進發！
再度包辦新歌作曲部分，Jennifer說歌曲取材自真實經驗：「《無得比》主要係講『比較』嘅心理，記得小學時，有個同學彈琴好叻、讀書又好，媽咪經常同我講『你學吓人啦，點解你咁差㗎？』當時成日覺得自己好無用。最近媽咪撞返呢位舊同學，原來過咗咁多年，我仍然耿耿於懷，暗地裏想同對方比較，睇吓邊個成功啲，我先發現呢個心態好恐怖，所以要用呢首歌提醒自己，唔好成日同人比較，要相信每一個人都係獨特嘅，希望透過呢首歌，鼓勵大家多啲欣賞同愛惜自己，相信自己係最完美。」
日前Jennifer拍攝新歌MV，對演戲駕輕就熟的她，首次放下演員身份，專心夾band唱歌，「第一次冇參與演戲嘅部分，放手交畀其他演員去做，同公司嘅方珈悠（Jamie）都有參與拍攝，好多謝大家仗義幫忙！不過因為緊張個效果，所以一早就嚟睇佢哋拍攝，當中有個小朋友可能太攰，中途扭計跑走咗，我突然有啲『導演上身』嘅感覺，一路喺鏡頭外教佢點做，呢個經驗幾特別，以後有機會都想執導自己MV，不過自知鏡頭處理方面唔係咁叻，所以希望可以合導。」
問到「余導」屆時會否趁機自肥，安排型男對戲？Jennifer竟自爆最想上演「動作戲」：「如果真係有個男主角，我唔想做啲好sweet嘅嘢，反而希望可以同佢嗌交，甚至拍打架嘅戲，咁樣拍出嚟我反而興奮啲。」
情人節將至，單身的Jennifer自言一點也不寂寞：「我啲朋友好好，會叫我一齊過節，所以我大時大節，都會黐住情侶同夫婦食飯，哈哈！好似啱啱嘅平安夜同聖誕節，我就連續兩日去做電燈膽，名符其實係聖誕燈飾。」
|
鍾意就快D Share啦！
|
|
|